Dula sa pangandoy ug panimalos

Nahadlok ka, Jamaica, nga mag-atubang og kaso sa Japan. Dili ra ba ka suheto sa maong nasud. Gawas pa, basin og tinud-on ni Takeshi ang paggukod nimo. Siya ra bay naggunit sa imong passport. Lisod  nag makomplikado ang sitwasyon para nimo. Mao nga milugos ka na lang pagtrabaho bisan may nahibilin pang diyotay'ng lamhon sa mga bun-og ug samad sa imong nawong ug lawas.

"I'm glad that you come back," matud ni Takeshi sa nagkasapidsapid niining Iningles. "I thought you forget our agreement in the contract."

"I'm not that stupid as you think I am, Takeshi," giingnan mo ang bayot nga club manager sa tingog nga may pagkasuplada.

Unya mibiya ka sa atubangan ni Takeshi. Misulod ka sa dressing room aron mangareglar sa imong kaugalingon. Paggawas nimog balik, nakita mo si Yukiko nga naglingkod atubangan sa usa ka lamesa. Misurok ang imong dugo pagkakita kaniya.

Nakamatikod ka nga wala mag-inusara si Yukiko. May kauban siyang usa ka Hapon nga sa pamostura pa lang, maila na nga adunahan ug influential kini. Aduna kiniy duha ka bodyguard nga nagtindog sa luyo niini. Gikulbaan kang nagtan-aw nila, Jamaica, apan wala ka magpasabot nga gikuyawan ka.Karon pa nimo makita ang maong Hapon nga nisulod sa club. Apan nakaseguro kang kauban kini ni Yukiko.

Pagkahuman sa usa ka tugtod, mibalik ka sa imong lingkoranan. Nag-retouch ka sa imong make-up dihang miduol si Takeshi sa imong nahimutangan.

"Yukiko wants to talk to you," nagkanayon si Takeshi.

"I don't want to," may kalagot ang imong tinubagan ngadto sa club manager sa Cloud 9 Karaoke Bar. "I don't feel like talking to him."

"You have to see him," gisigahan ka sa mata ni Takeshi. "Now!"

Nakugang ka, Jamaica. Nabag-ohan ka sa gipakitang lihok ni Takeshi. Morag nawagtang na ang binayot nga lihok niini. Morag kalit lang kining nahimong usa ka matuod nga lalaki. Pero ang lain nimong gikahibudngan mao nga daw balisa pag-ayo si Takeshi. Gipaningot kinig maayo bisan sa kabugnaw sa kagabhion. (Sumpayan pa)