Dula sa pangandoy ug panimalos

Usa ka semana nga wala ka mosulod sa club nga imong gitrabahoan, Jamaica. Nagpaalim ka una sa mga samad ug bun-og sa imong lawas nga namugna sa pagpasipala ni Yukiko kanimo. Nanghubag ang imong kalawasan tungod sa grabeng bun-og.

Samtang nagpahulay ka sa flat nga imong gipuy-an uban sa tulo nimo ka kaubang Japayuki, takulahaw lang misantop sa imong hunahuna ang pagpauli sa Pilipinas. Gibati mo na ang kamingaw sa imong mga ginikanan didto sa inyong probinsiya. Karon nga may daotang nahitabo nimo, gusto kang mahiduol sa kiliran sa imong parents.

Gusto ka na sab nga makalikay kang Yukiko. Sa iyang gibuhat nimo, wala nay bug-at nga hinungdan aron ipadayon mo pa ang pagpakigrelasyon kaniya. Ug ang bugtong paagi nga imong nahunahunaan aron makalikay ka sa hingpit kang Yukiko mao ang pagpauli sa Pilipinas. Didto dili ka na gyod niya matultolan.

Apan usa ka gabii niana, sa pagpauli sa tulo nimo ka kaubang Japayuki gikan sa club, nagdala silag daotan nga balita alang nimo.

"Nasuko pag-ayo si Takeshi nimo, Jamaica," si Maan maoy mitaho kanimo sa ilang pag-abot sa flat gikan sa Cloud 9 Karaoke Bar. "Kun di pa kuno ka motrabaho ugma, isumbong kana niya sa kapolisan kay wala kuno ka motuman sa kontrata."

"Wa ba diay ninyo siya suginli sa nahitabo nako?" Nakapangutana ka.

"Amo siyang gitug-anan," si Norie ang mitubag. "Pero wa hatagig gibug-aton sa bayot nga dako ang among gisulti kaniya."

"Utro sab nga salbahis kanang Hapona," nagpaminti ka. "Way konsiderasyon. Hakog! Pulos lang kuwarta ang gihunahuna. Way puangod."

"Ingon gyod niana si Takeshi," misagbat si Cristy. "Morag dili tawo ang iyang pagtratar sa mga Japayuki. Ubos kaayo ang iyang pagtan-aw nato."

Mibati kag tumang kalagot sa club manager sa Cloud 9 Karaoke Bar nga imong gialagaran. Pero wala kay nahimo. Pabor ngadto niini ang kahigayonan. Dili ka gustong makabaton og laing problema mao nga pagkaugma misulod ka na sa bar nga imong gitrabahoan. (Sumpayan pa)