Sex Worker

Nakugang si Ryan sa akong gisulti. Iya kong gitutokan.

"Bantog ra nga ingon sa sinati na gyod nako ang imong panagway," giingnan ko si Ryan."Nahinumdom na ko. Didto ko ikaw unang nakita sa Consolacion. Nagkuyogkuyog ka ni Padre Miguel sa una. Nahinumdom pa ko niadtong panahona nga siyay padre kura sa Consolacion. Magmisa man siya kada kataposang Sabado sa buwan sa among kapilya sa barangay. Apil man gani ko sa gimugna niyang children's choir. Wa lang ko magdugay kay masuko man si Mama kun mag-apil-apil ko sa mga kalihokan sa simbahan. Ikaw diay tong bata nga ikuyog ni Padre Miguel kanunay?"

"Ako kadto. Dako kog utang kabubut-on kang Padre Miguel tungod kay buotan siya kaayo. Siya'y nakapahimo nakong tawo. Mao kini ang hinungdan nga nagpari ko tungod kay gusto kong makasunod sa iyang mga lakang."

"Mosawsaw ba sab kadto si Padre Miguel og babaye?"

"Ambot lang. Pero nagtuo kong dili. Suheto ko niya. Ligdong siyang mialagad sa simbahan hangtod sa iyang kamatayon."

"Unya, ikaw? Mogamit man lagi kag babaye? Wa diay ka makasunod sa mga lakang ni Padre Miguel nga imong idolo?"

"Husto ka. Pero naingon ko niini tungod kay tawo lang ko ug may kahuyang. Angkonon nako nga weakness nako ang mga babaye. Maoy pagaingon nga lisod gyod subayon ang hagip-ot nga dalan paingon sa langit. Ambot ba, uy. Lisod kab-oton ang pagka perpekto. Lisod kaayo alang nako ang paglikay sa tentasyon sa mga babaye. Pero karon na man lang sab ni, ba, nga gidid-an na sa pagminyo ang mga pari. Kaniadto may mga asawa man ang mga pari ug mga obispo."

"Wa man sab ka magminyo. Nagtilawtilaw ra man ka ni bisan kinsang babaye."

"Gisultihan ko na ikaw kaganina sa hinungdan nganong di ko magminyo. Bentaha na lang ning akong gihimo. Wa man nako supaka ang vow of celibacy."

Unya akong gipahunat si Ryan.  (Sumpayan pa)