Wala dayon ko makatingog. Wala man god ko magdahom nga ang bahin sa akong trabaho isip usa ka commercial sex worker maoy ipangutana ni Ryan. Pero alang nako, dili daotan ang iyang pangutana. Busa gitubag ko siya.
"Wa koy laing nakamaohan gawas niining maong trabaho," gipasabot ko si Ryan. "Kuwang ko sa edukasyon. Igo ra kong nakahuman sa hayiskol."
"Nganong wa ka man motiwas og eskuyla?" Nangutana siya.
"Sayo kong nailo sa amahan. Namatay si Papa sa nag-edad pa kog dose. Human sa iyang kamatayon, ingon sa nawad-an na og direksiyon ang akong kinabuhi."
"Nganong nakasulti ka man og ingon niana?"
"Usa ka seaman ang akong maahan. Sulod sa duha o tulo ka tuig, kausa ra siya mokanaog sa barko nga iyang gisakyan. Samtang nanakay si Papa sa barko, si Mama miduwa sab sa laing team. Saksi ko sa pagbudhi ni mama sa kaminyoon nila ni Papa. Nakigrelasyon siya ni Noy Berto. Dihang naabtan og bagyo sa China Sea ang barko nga gisakyan ni Papa, nalunod kini ug naapil siya sa listahan sa mga tripulante nga nangamatay. Pipila lang ka buwan human sa kamatayon ni Papa, si Noy Berto mitipon na pagpuyo sa among balay. Supak sa akong kabubut-on ang pagpuyo ni Noy Berto sa amo apan wa koy nahimo kay kagustohan man kini ni Mama. Inanay ko nalang untang gitun-an ang akong kaugalingon pagdawat kang Noy Berto isip akong ama-ama. Total, patay na man sab si Papa. Apan salbahis siyang dako. Usa ka higayon niana nga wala si Mama sa balay, iya kong gilugos. Ang nakapait pa gyod kay wa motuo si Mama sa dihang ako siyang gitug-anan bahin sa gibuhat ni Noy Berto nako. Ako na hinuon ang iyang gitulisok sa nahitabo kay kuno mikundat ko. Tungod sa akong kahiubos. milayas ko gikan sa amo ug mianhi sa siyudad. Dinhi ko nakakat-on pagbaligya sa akong unod."
"Managsama diay tang nakabaton og inahan nga way puangod."
"U-unsay buot mong ipasabot?"
Dugay kaayong nitubag si Ryan. Miduko siya sa akong atubangan samang giitlib niya ang ubos niyang wait. (Sumpayan pa)