Dula sa pangandoy ug panimalos

Miabot gyod ang panahon nga nangulitawo si Yukiko kanimo, Jamaica. Wala gyod nimo palabya ang higayon. Gidawat mo ang iyang gugma. Ang tinuod, wala ka makagusto kang Yukiko. Ang kuwarta lang niya maoy imong giapas kay natino na man nimo nga baga kaayo siyag pitaka. Maong gidula-dulaan mo ang iyang gugma.

May mga higayon nga ingon sa buot nang angkonon ni Yukiko ang imong pagka babaye. Apan wala ka magpadala sa kainit sa inyong pagpinarayganay. Abtik kang mopugong sa iyang kamot sa higayon nga iya nang tangtangon ang kataposang salimbong sa imong pagka babaye. Wala ka magpaanod sa kalalim sa gihimo niyang pagana.

"I'll preserve this until our wedding," maoy imong isulti sa Hapon dayon hapuhap sa nag-ugdong butang taliwala sa duha nimo ka paa.

Nagpasalamat ka nga nagpakitag respeto ang Hapon kanimo. Dili gyod mamugos si Yukiko. Mopatuo kini kun imong badlongon. Mo-behave.

Tungod sa imong pagpakigrelasyon kang Yukiko, nakapadala kag dakong kantidad sa kuwarta ngadto sa imong mga ginikanan. Imong gisugyotan ang imong mga ginikanan sa Pilipinas nga mangitag balay nga kapuy-an sa kinapusoran sa lungsod. Kun wala, gusto mong mopalit silag yuta sa sentro sa lungsod nga katukoran og balay. Andam kang moabaga sa galastohan sa pagpatukod og balay sa imong mga ginikanan, Jamaica.

Gusto kang mohunong na sa pagpanguma ang imong amahan. Misugyot ka sa imong Tatay Pedring nga iuli na ngadto sa tag-iya niini ang yuta nga iyang gitikad ug maninda na lang sila  sa sentro sa lungsod. Gusto kang mahilayo ang imong mga ginikanan sa pamilya ni Ranil. Nabalaka ka nga tingalig ang imong mga ginikanan maoy pahimungtan ni Ranil karon nga ania ka na sa Japan. Nagtuo kang nasilag gihapon si Ranil kanimo ug dili ka buot nga lakip ang imong mga ginikanan maangin.

Usa ka adlaw niana, nakadawat kag sulat gikan sa imong ig-agaw. Gipamalihog diay siya sa imong mga ginikanan pagbalos sa imong sulat. Gibalita sa sulat nga natuman ang tanan nimong mga sugyot ngadto sa imong mga ginikanan. Mibalhin na diay silag puyo ngadto sa kinapusoran sa inyong lungsod. (Sumpayan pa)