Sama sa gisulti ni Yukiko sa inyong panagsulti sa telepono, untop gayod nga alas nuybe sa buntag sa adlaw'ng Domingo nahiabot na siya sa inyong flat, Jamaica. May rollers pa gani ang imong buhok dihang imo siyang gisugat.
"Are you ready?" Gipangutana dayon ka ni Yukiko nga sa imong pagkamatikod, ingon sa excited na kaayong makigpanuroy uban kanimo.
"Not yet," gitubag mo siya. "You're so early."
"I said 9 o'clock," sa Hapon pa nga imong gipadayon ngadto sa gamay nga receiving area sa flat nga imong giabangan uban sa tulo nimo ka kaubang mga Japayuki.
"Give me thirty minutes to dress up and make up," giingnan mo ang Hapon.
"It's okey with me," matud sa Hapon nga milingkod sa usa ka settee.
Gibiyaan nimo ang Hapon sa receiving area. Misulod ka ngadto sa nahimutangan nila ni Cristy, Maan ug Norie aron mag-ilis. Ug samtang nag-ilis ka ug nangareglar sa kaugalingon, gipalibotan ka sa tulo nimo ka kauban.
"Mokuyog gyod kas Hapon?" Gikan ni Norie.
"Oo," mubo mong tubag. "Ngano man diay? Mokuyog ka?"
"Dili, uy," daling tubag ni Norie.
"Kursonada ka man kaayong mokuyog nianang Hapona," misagbat si Maan. "Ayaw'g kompiyansa, uy. Basin og asa ka niya dad-on."
Hadlokan si Maan. Napugos lang kini pag-abroad aron makakuwarta og dako ug makatabang sa pamilya niini. Nasayod kang dili daotan ang pahimangno ni Maan kanimo. Posibleng mahitabo ang iyang gikahadlokan. Apan wala kini makaliso sa nabug-os mo nang hukom, Jamaica, sa pagkuyog kang Yukiko. Gusto kang makigsuod pag-ayo sa Hapon aron inanay nga makabaton og katumanan ang imong mga pangandoy.
"Ayaw kabalaka, my dear," giingnan mo si Maan. "Sa dihang nakahukom ko pagsulod ning maong matang sa trabaho, giandam ko na ang akong kaugalingon sa bisan unsang posibleng mahitabo. Unsaon ta man kun demalason. Pero kun buligan kos kahigayonan, aw, salamat sa Dios. Kun magbinuang si Yukiko nako, patyon ko sab siya kun makahigayon ko. Ug bahala na." (Sumpayan pa)