Sex Worker

Pagsulod nako sa RGB Inn, akong giingnan ang receptionist nga moadto ko sa room 314. Wala na kini magdaghan og kuti-kuti. Igo lang kining miyango agi'g pagtugot sa akong pananghid. Misakay dayon ko sa elevetor paingon sa ikatulong andana.

Gipangita dayon nako ang room 314. Dihang nakaplagan ko na kini, wala na lang ko mag-buzzer kay ako man nga namatikdan nga mikang-a og diyotay ang palid sa pultahan. Morag gituyo nga wala i-lock. Maong gitukmod ko na lang og hinay ang palid sa pultahan. Naabli kini ug misulod dayon ko. Gi-lock nako ang pultahan.

Unya .... ang bayhon sa usa ka lalaki. Kini ang unang mitimbaya sa akong panan-aw sa nakasulod na ko sa hingpit sa lawak 314 sa motel. Naghigda siya sa kama samtang nagtan-aw sa X-rated nga salida sa telebisyon. Misantop dayon sa akong hunahuna nga siya na ang kustomer nga giingon ni Gabor nga naghulat nako. Wala nay lain. Siya na gyod ang kustomer nga maoy buot ipasbaot sa akong bugaw.

Mibangon ang lalaki pagkamatikod niya nga nakasulod na ko sa lawak. Gipahinayan niya ang telebisyon pinaagi sa remote control nga iyang gigunitan. Milingkod siya sa ngilit sa kama. Ug sulagma nga nagkatagbo ang direksyon sa among tinan-awan.

Sa unang higayon akong namatikdan nga ambongan ang maong lalaki. Nasihag nako ang kaaghop nga mihulma sa iyang panagway. Apan dihang milahutay ang amogn pagtinutokay, akong nakita nga kasipat nga nagpahipi sa iyang nawong. Mora siyag doble kara. Ang pikas niyang nawong buotan samtang ang lain niyang nawong bilyako.

Morag dagway ni Jesus ug ni Judas nga nahukad diha sa usa   lang ka binuhat. O kaha ang lakin-ong bersiyon sa kiyubistikong hulagway ni Dora Maar.

"Nganong imo man kong gitutokan?" Nangutana ang lalaki.

"W-wa man," mubo kong tubag. "May nahinumdoman lang ko."

"Unsa man?"

"M-morag sinati nako ang imong panagway. Morag nagkahimamat na ta sa una." Milighot ang hilaw nga pahiyom sa panagway sa lalaki. (Sumpayan pa)