Nalipay ka sa gipahibalo sa employment agency nga imong giaplayan, Jamaica. Sa kataposan, matuman na gyod ang imong pangandoy nga makatrabaho sa abroad. Misantop sa imong hunahuna nga dili gyod ka tantong demalas kay gibuligan man sa kahigayonan ang imong paningkamot. Mipabor kanimo ang suwerte.
Sakto ang tayming sa pagpahibalo sa agency kanimo. Nagkinahanglan ka na gyod og trabaho ilabi na karon nga patay na ang imong manghod nga maoy nagsuporta kaniadto sa inyong mga ginikanan. Nabutang na karon sa imong mga kamot ang kaakohan sa pag-abag sa imong mga ginikanan mahitungod sa panginabuhi.
"Mo-abroad ka gyod diay, Jamaica," kahilakon ang imong Nanay Mimang dihang imo na siyang gisultihan nga molarga ka na paingon sa Japan.
Sa sunod semana na ang akong paggikan, Nay," giingnan mo siya.
"Mopalayo ka na gyod diay namo?" Dugang sentimento sa imong inahan.
"Alang kaninyo ang akong pagpaningkamot, Nay," mipasabot ka. "Gusto kong makatagamtam sab kamog kaharuhay sa kinabuhi."
"Kun kami lang ang masunod, Jamaica," misagbat ang imong Tatay Pedring. "Dili gyod unta mi mosugot nga mo-abroad ka pa. Total, mabuhi man kita dinhi pinaagi sa pagtikad sa yuta. Makasugakod pa man ko sa pagpanguma."
"Nasayod ko, Tay," matud mo. "Pero nasayod kong dili mahimong mag-uma ka na lang gyod hangtod sa hangtod. Nagkatiguwang na baya mo. Ug sa mosugot mog sa dili, moabot ang panahon nga dili ka na makasugakod pagtikad sa gisaopan ninyong yuta. Busa panahon na nga ako na sab ang manarbaho. Hinaot nga inyo kong hisabtan."
Wala na magtingog ang imong mga ginikanan tungod sa kabug-at sa imong mga katarongan. Ug nangandam dayon ka alang sa imong paglarga.
Tuod man, nahinayon gayod ang imong paglarga ngadto sa Japan, Jamaica. Pag-abot nimo didto sa Tokyo, nagsugod dayon ka sa imong trabaho isip usa ka Japayuki sa Cloud 9 Karaoke Bar. Sa sinugdan, bakikaw ang imong panglihok. Apan dangtag pipila ka adlaw, naka-adjust ka na sa imong trabaho. (Sumpayan pa)
