Dula sa pangandoy ug panimalos

Nasayod kang taphaw ra kaayo ang gihimo mong alibi, Jamaica, apan wala kay laing nahunahunaang paagi aron makalikay ka na kang Delton. Ang kamatayon ni Jessa maoy imong gihimong hinungdan sa pagpakigbulag mo kang Delton. Apan bisan ikaw mismo nakasabot nga irrelevant kaayo ang mao mong katarongan.

"Dili ko mosugot, Jamaica," nagkanayon si Delton. "Dili ko mosugot nga bugtoon mo ang atong relasyon sa dakong kasayon. It's unfair nga human sa tanan kong pagtabang nimo, makigbuwag ka na nako. Dili ko makadawt niini, Jamaica."

"Gikasubo ko, Delton," giingnan mo siya. "Pero dili na malubag pa ang akong desisyon. Bahin sa imong pagtabang nako, ayaw kabalaka. Bayran ko unya ikaw kun makatrabaho na ko sa abroad. Kuwentaha lang daan ang tanan mong nagasto nako."

"Wa ko magpaabot og bayad sa akong pagtabang nimo, Jamaica. Ang gusto ko lang mahitabo mao nga magmatinud-anon ka sa atong relasyon."

"Di ka ba makasabot sultihan, Delton? Gusto na kong makigbuwag nimo tungod kay gihasolan ko sa atong relasyon. Pun-an pa sa nahitabo sa akong manghod, nagsipok nag maayo ang akong ulo. Mao nga break na ta. Nakasabot?"

Huyhoy ang mga abaga ni Delton nga mikanaog sa inyong pinuy-anan, Jamaica. Nakaseguro kang gisakitan siya pag-ayo sa imong gibuhat. Apan gikahimuot mo ang nahitabo. Gusto ka gyod nga masakitan ang tanang mga lalaki nga malambigit kanimo.

May mga higayon nga mo-text si Delton kanimo. Sa iyang mga text message, nasabot nimo nga gusto kining madugtong pagbalik ang inyong relasyon. Apan wala ka nay interes kang Delton. Aron dili na siya magsamok nimo, nag-ilis kang SIM sa cellphone.

Apan taas gayod og pailob si Delton. Misulay kinig pamisita kanimo makatulo ka higayon pero wala mo siya atubanga. Nagpasumangil ka nga gilabdan ug  ang imo rang mga ginikanan maoy nakigsulti kaniya. Sukad niadto, wala na gayod magpakita si Delton kanimo. Ug kini hilom mo usab nga gikalipay.

Usa ka adlaw niana, nakadawat kag tawag gikan sa ahensiya nga imong giaplayan. Gipahibalo ka nga naandam na ang tanan alang sa imong paglarga ngadto sa Japan. (Sumpayan pa)