Sex Worker

Si Evan mao ang matang sa mediaman nga gitawag og haoshiao. Kurakot  siyang dako. Usa ka extortionist. AC-DC ang iyang tirada. Kanang gitawag og "attack, collect -- defense, collect" nga pagpanibya. Atakehon niya sa pagsaway ang usa ka tawo bugti sa gibayad sa kontra sa maong tawo kaniya. Kun atakehon sab ang tawo nga iyang gidapigan, siyay modepensa niini pinaagi sa iyang tulumanon sa radyo. Bayran sab siya sa personahe nga iyang gidepensahan sa kahanginan.

Ingon niini ang matang sa pagka mediaman ni Evan. Walay klarong baroganan. Dili patas kun mangomentaryo kay mao man gyoy iyang paboran kadtong tawo nga nagbayad kaniya. Busa dili siya objective sa iyang pagpangomentaryo. Kun asa siya makasapi, adto siya mopabor. Kadtong tawo nga dili niya masapian maoy iyang daoton sa iyang tulumanon sa radyo. Below the belt na gani ang iyang mga komentaryo.

Ang kasagaran sa mga tawo nga maoy iyang ig-on sa iyang programa sa radyo mao ang mga politiko, mga taas nga opisyal sa nagkadaiyang ahensiya sa gobyerno ug bisan ang mga pribadong indibiduwal nga gusto niyang panguwartahan. Kadali ra siyang makakita og isyu nga minao-mao ug dili nga iyang ibato ngadto sa mga tawo nga gusto niyang panguwartahan. Walag tuo ang iyang panguwarta.

Usa ka higayon niana, nagdala si Evan og Banat News sa among pagtsek-in sa usa ka motel. Human sa makutas namong engkuwentro sa kama, nagbasabasa ko sa maong pamantalaan. Nadapit ang akong pagtagad sa ulohan sa balita nga nagkanayon: Indian National Nanghagis, Gidakop. Gibasa nako ang katibuk-ang estorya niini. Akong nasayran nga si Hafid diay ang maong Indian national. Nanghagis siya sulod sa usa ka karaoke bar maong gidakop siya ug gibalhog sa bilanggoan.

Laing balita nga nakapainteres nako mao ang mahitungod kang Leandro, ang kanhi kong suki nga usa ka konsehal sa barangay. Gipahamtangan diay siya og preventive suspension sa korte samtang nagpadayon pa ang paghusay sa kaso nga gipasaka batok kaniya. Nakapanglingo ko samtang nagbasa sa maong balita. (Sumpayan pa)