Dula sa pangandoy ug panimalos

Gitug-anan mo si Delton nga ex-boyfriend nimo ang usa sa mikulata kaniya, Jamaica. Nahingawa ka sa iyang kahimtang nga nakaangkon og daghang mga bun-og.

Kadtong lalaking unang miduol nato," giingnan mo si Delton. "Mao kadto ang akong ex-BF, si Ranil. Taga Tambo to siya."

"M-magbayad siya sa iyang gibuhat nako," bahad ni Delton. "Siya ug ang iyang mga kauban nga mitabang pagkulata nako."

"Delton, please ... ayaw na lang pagbawos. Di nako gustog samok."

"Ayaw kabalaka, Jam. Ipaagi ko sa balaod ang akong pagbawos nila."

Tuod man, nianang pagkaugma samtang nagdula ka og sudoku games  sa sala sa inyong balay, nahiabot ang imong inahan ug nagpahibalo kanimo nga gidakop si Ranil ug ang mga higala niini sa mga polis. Mipasaka diay og kaso si Delton ug kaso batok kanila tungod sa ilang pagkulata niini kagahapon didto sa beach resort.

"Maayo hinuon," miingon ka. "Aron motagam sila."

"Moingon ka lang niana?" Nagkanayon ang imong inahan.

"Kay unsa man diay angay kong buhaton? Maguol ko nga gidakop sila si Ranil?"

"Pero dili mo angay ikalipay ang nahitabo nila ni Ranil. Ikaw bayay nakaangin kun nganong nakulatahan ni Ranil ug sa iyang mga higala si Delton."

"Ug nganong ako man kuno?"

"Tungod sa dakong gugma ni Ranil nimo. Dili siya makadawat sa imong pagpakigbuwag niya. Nasayod mi nga nahigugma pag-ayo si Ranil kanimo, Jamaica."

"Unya, mamugos diay siya bisan wa na koy gusto niya?

Wala nay gikasulti ang imong inahan tungod sa kalig-on sa imong katarongan. Igo na lang kining nakapanglingo. Unya gibiyaan mo siya. Misulod ka sa imong lawak.

Nabalhog gayod sila si Ranil ug mga kauban sa municipal jail. Mibutang dayon og piyansa ang iyang mga ginikanan aron maangkon ni Ranil ang temporaryo niyang kagawasan. Nasayran mo gikan kang Delton nga tinud-on gayod sa iyang pamilya ang kaso nga ilang gipasaka batok ni Ranil ug mga kauban. (Sumpayan pa)