Dula sa pangandoy ug panimalos

Gikuyawan ka dihang nagkasugat ang tinan-awan ninyo ni Ranil, Jamaica. Hait kaayo kinig tinan-awan kanimo. Mitan-aw usab kini ngadto kang Delton.

"Mao diay nga nakigbuwag ka kanako kay may lain ka na man diay nga gikabuangan," nagkanayon si Ranil nga misukmat kanimo.

Wala ka motingog, Jamaica. Mikusog pag-ayo ang butokbutok sa imong dughan.

"Siya diay ang imong gipuli kanako, Jamaica?" Gikan kang Ranil.

"Ranil, mahimo ba," nanghangyo ka sa kanhi mong karelasyon. "Ayaw mig samoka. Pasagdi ming duha. Please ... di mi gustog gubot."

"Kinsa ba kining lalakiha, Jamaica?" Misagbat si Delton sa panagsulti ninyo ni Ranil. "Ngano ba nga kun manulti siya, morag dako man siyag papel sa imong kinabuhi? Pasabta ko niini, Jamaica."

Motubag ka na unta dihang nakita mo nga kalit lang mihamag si Ranil ngadto kang Delton. Milupad ang tuong kinumo ni Ranil ug maayong pagkaigo niini ang apapangig ni Delton. Nahasarasay si Delton. Igo ka lang nakasinggit sa kakuyaw. Wala ka makalihok. Daw sa nahalansang ka sa imong gibarogan, Jamaica.

Giusab pa og sumbag ni Ranil si Delton apan nakabantay na ang naulahi. Nakalikay kini sa naghagiyos nga kinumo ni Ranil. Ug mao kadtoy sinugdanan sa ilang pagtaksanay sa kusog. Misukol si Delton kang Ranil. Nagsumbagay sila.

Apan may mga kauban diay si Ranil. Dihang nakita nila nga nagsumbagay sila si Ranil ug Delton, midali sila pagduol. Mitabang sila sa pagkulata kang Delton. Dihang luya ug nagkadugo na si Delton, gipugngan siya nila ug si Ranil nagtagbaw sa kaugalingon niini sa pagsumbag kang Delton. Hangtod nakuyapan si Delton.

Midali pagbiya sa beach resort si Ranil ug ang iyang mga kauban dihang wala nay panimuot si Delton. Diha ka pa magkara-kara sa pagpangayog tabang, Jamaica. Nahadlok ka sa nahitabo kang Delton. Napuno sa bun-og ang iyang nawong ug lawas.

"Kinsa sila, Jamaica?" Gipangutana ka ni Delton sa dihang nabalikan na siya sa  maayong panimuot. (Sumpayan pa)