Dula sa pangandoy ug panimalos

Namula ang nawong ni Ranil sa iyang nadungog gikan kanimo, Jamaica. Morag nakasabot na siya karon nga gihimo mo lang siyang instrumento aron matuman ang imong pangandoy sa kinabuhi. Nga gipahimuslan mo ang iyang paghigugma kanimo.

Tungod ba kaha sa gibati niyang kalagot, gihan-an ka niyag tamparos. Apan wala ka molikay. Gipatara hinuon nimo ang imong  kaugalingon.

"Sige,'' matud mo. "Tamparosa ko kun gusto kang mag-atubang og kaso."

"Hayop ka, Jamaica," nagkanayon si Ranil. "Wa ko magtuo nga makahimo kag ingon niini kanako. Salbahis kang dako!"

"Dili ka makapamuyboy nako, Ranil. Tinuod nga dako kog  utang kabubut-on nimo. Pero gisuklian ko usab ang imong kaayo pinaagi sa pagtugyan nako sa akong pagka babaye nganha nimo. Busa dili ka alkanse kay nakatilaw ka man sa akong kalami."

Wala na motingog si Ranil. Nagpunay lang kinig pangusmo. Unya nanggawas mo sa hotel. Wala mahinayon ang giplano ninyong overnight.

Sukad niadto, gilikayan mo na si Ranil, Jamaica. Nag-amping ka nga dili niya mabaslan. Nakaseguro ka nga nasilag na si Ranil kanimo human sa imong gibuhat. Dili ka gusto nga makahigayon siya sa pagpanimalos kanimo.

Ang imong gibuhat kang Ranil nakapahinumdom nimo sa kanhi mong boyfriend nga si Maynard. Kanindot unta kun si Maynard pay imong nabuhatan sa sama sa gibuhat mo ngadto kang Ranil. Makabalos kana gyod unta kaniya sa hingpit. Kay siya man ang hinungdan kun nganong naingon ikaw niini. Si Maynard ang hinungdan nga nahimong miserable ang imong kinabuhi. Siya ang hinungdan nga nawagtangan kag pagsalig sa mga lalaki. Oo, si Maynard ang hinungdan nga nakakat-on ka pagpakigdula sa gugma.

Nalipay ka nga wala magsamok si Ranil nimo. Apan wala gihapon ka mokompiyansa. Tingalig hilom nga nagplano si Ranil sa pagpanimalos nimo. Nasayod ka  god nga dili lalim alang kang Ranil ang imong pagdula-dula sa iyang gugma.

Wala dangtig usa ka bulan, nahiabot sa imong kinabuhi si Delton. Anak siya sa bise mayor sa inyong lungsod. Nangulitawo siya nimo. Ug wala ka maglanganlangan pagdawat sa iyang gugma. (Sumpayan pa)