Sex Worker

Natapos ang malipayong mga adlaw ni Duane sa dihang nabulilyaso ang salawayon niyang mga buhat. Nabutyag ang kanunay niyang paggamit og babayeng mubog lupad sa higayon nga siya on duty. Nabisto usab nga pasakyon ko niya sa patrol car sa higayon nga dad-on ko niya sa usa ka motel kay mitestigos man batok kaniya ang driver sa taxi nga nadumbolan sa patrol car paggawas namo gikan sa motel.

Gipistahan sa taga media ang pagkabulilyaso ni Duane. Lakip ako gustong kuhaan og pamahayag sa mga reporter apan nagdumili ko pagtubag sa ilang pangutana. Nagdumili sab ko pag-atubang sa kamera sa mga TV network ug sa mga photojournalist. Gusto kong manghunaw sa bisan unsang kalambigitan sa nahitabo kang Duane. Dili ko angay nga malambigit sa iyang problema kay usa man lang ko ka commercial sex worker nga mikuyog niya ngadto sa motel alang sa hamubong kalipay nga binayran.

Gawas sa pagkataktak ni Duane sa trabaho, si Lagrido gilabay sab ngadto sa laing dapit. Naangin gyod si Lagrido sa kabuang ni Duane. Apan ako nagpadayon sa naandan kong panginabuhi human sa maong hitabo. Daghan gihapon kog kustomer. Kanunay  sab kong magpa-hygiene aron pagseguro nga dili ko masakit ug ingon man ang mamahimo kong kustomer. Bisan mirisgo ko sa ingon niining matang sa panginabuhi nga prone kaayo sa sexually-transmitted diseases apan nag-amping gihapon ko sa akong panglawas.

Ang sunod nakong nahimong suki mao si Leandro. Bohemyo siya nga pagka lalaki. Dili tihik mogasto sa babaye nga iyang makursonadahan. Namatud-an ko kini sa dihang nagkasuki kami. Dili ko niya dad-on sa usa ka cheap nga motel. Sa usa ka luhong hotel gyod ko niya i-check in. Dili sab siya mo-check in og short time. Gusto gyod niya nga overnight aron matagbaw siya pagdimdim sa kalami sa akong pagka babaye.

Usa ka barangay konsehal si Leandro sa usa sa mga barangay sa dakbayan sa Sugbu. Sa akong nasayran, negosyante ang iyang asawa. Si Leandro sab, gawas nga opisyal sa barangy, nagdumala usab og usa ka security agency. Mao nga bongga si Leandro. Ang ako lang gikabalak-an nga basin masayod ang iyang asawa sa iyang pagpakabuang nako ug awayon ko niini. Maldita ra ba kuno ang iyang asawa. (Sumpayan pa)