Sex Worker

Maayong pagkalumping sa atubangang bahin sa taxi nga nabanggaan sa patrol car nga among gisakyan. Mokanaog unta ang polis nga nagmaneho sa patrol car aron kaha makigsulti sa driver sa taxi apan gibadlong siya ni Duane.

"Diretso, Lagrido," giingnan ni Duane ang kauban niyang polis nga maoy nagdrayib sa patrol car. "Mosibat ta samtang may higayon pa."

"Pero, Sir,"ni Lagrido pa. "Tingalig unsay nahitabo sa driver sa taxi nga atong nadumbolan.'

"Bahala na siya sa iyang kaugalingon," ni Duane pa."Pagdali. Mosibat na ta samtang wa pay laing nakakita nato. Delikado kun may makaila nato dinhi."

Gipadagan dayon ni Lagrido ang patrol car nga among gisakyan. Tungod ba kaha kay natarantar sa nahitabo ug sa pagdinali aron dili sila mailhan, si Lagrido wala na magsubay sa saktong lane. Diha na siya mag-agi sa dalan nga maoy agianan sa mga sakyanan nga among gikasugat. Kusog ang iyang pagpadagan nga daw sa gigukod.

Pag-abot namo sa unahan, laing disgrasya ang nahitabo. Tungod sa pagpangawat ni Lagrido og agianan, nabanggaan namo ang usa ka Nissan Urvan nga naghunong sa daplin sa dalan. Ang atubangang bahin sa patrol car maayo gyong pagkasungag sa atubangan sab nga bahin sa Nissan Urvan nga gi-parking sa daplin sa dalan.

Nakasiyagit ko sa kalisang. Abi kog mao na kadtoy akong kataposan. Pero si Duane kalma lang kaayo. Nagdali siyang nanaog sa patrol car pagkakita niya nga naabli ang bentana tungod sa manibela sa Nissan Urvan nga among nabanggaan ug midungaw ang usa ka lalaki nga mao tingaliy nagmaneho sa maong sakyanan.

"Polis ako!" Nadungog ko si Duane nga namulong niini. "Polis ako!"

Ang maong pangangkon ni Duane nakapasamot hinuon sa iyang bulilyaso. Ang tag-iya sa Nissan Urvan nga among nabanggaan   editor-in-chief diay sa usa ka lokal nga pamantalaan sa Sugbu. Gihingusgan gayod sa maong editor ang paggukod kang Duane nga maoy nahimong hinungdan sa pagkataktak niya sa trabaho. (Sumpayan pa)