Sex Worker

Nahuman ang unang hugna sa kombate namo ni Duane ibabaw sa kama. Namatikdan ko nga kadali rang nahuwasan sa kakutas ang tontong polis. Kondisyon na sab kaayo siya ug gusto nang mo-score pag-usab. Higal sab kaayong tawhana.

Gipaundayonan ko siya sa iyang gusto. Gibayran god ko niyag sakto. Isip akong kustomer, akong kaakohan ang paglipay kang Duane kutob sa akong mahimo. Mao nga gilipay gyod nakog maayo si Duane. Makadaghan ko siya pasakya sa hubo kong lawas ug ako siyang gilupad ngadto sa binayran nga paraiso.

"Suki na ta, ha," nagkanayon si Duane sa dayon na namong gawas sa motel.

"Kun maoy imong gusto, nganong dili?" Giingnan ko siya. "Pero wa na magpasabot nga di na ko mo-entertaiin og laing kustomer."

"Oo," mitando ang polis. "Pero hasta magkinahanglan ko nimo, kinahanglang ako gyod ang imong priority. Total, mobayad man kog sakto."

"Aprub!" Dali  nakong tubag.

Sukad niadto, kanunay nang mokuha si Duane sa akong serbisyo. Magabii ang iyang duty sa estasyon sa polisya diin siya nadestino. Yabag gyod nga pagka polis si Duane kay imbes magtuman sa iyang katungdanan, adto na man hinuon siya magyampungad sulod sa lawak sa usa ka motel kauban nako atol sa mga takna nga on duty siya.

Kun dunay mga untoward incidents, seguradong dili gayod makaresponde si Duane sa alarma kay nagkuyog man mi sulod sa motel. Dala pa gyod niya ang patrol car sa kapolisan busa walay masakyan ang iyang mga kaubang polis nga motubag sa alarma. Badlongon gyod ning polisa. Anugon lang ang buhis sa katawhan nga gisuweldo niya.

Dihay kausa nga gipasakay ko ni Duane sa patrol car. May kauban siyang laing polis nga ubos niyag ranggo. Kiniy iyang gipamaneho sa patrol car nga among gisakyan. Nagtupad ming duha pagpanglingkod luyo sa driver.

"Asa man diay ta?" Nangutana ko dihang akong namatikdan nga lahi na ang dalan nga among gisubay. (Sumpayan pa)