Nakugang ka sa gibalita sa imong higala, Jamaica. Mora kag nalipong dihang iya kang gisuginlan nga gitakda na ang kasal nila ni Maynard ug Casilda. Nakalitan ka ug dili makatuo. Labaw sa tanan, gisakitan ka, Jamaica.
Nakaila ka sa babaye nga maoy minyoan ni Maynard. Anak si Casilda sa usa ka adunahang magpapatigayon sa inyong lungsod. Managsilingan sila si Maynard sa barangay Poblacion. Ug wala ka magdahom nga si Casilda maoy moilog ni Maynard gikan kanimo. Wala ka magtuo nga siyay hinungdan nga wala makatuman si Maynard sa inyong sabot nga makig-atubang kini sa imong mga ginikanan sa nakalabay nga Abril 14.
Wala mo kapugngi ang pagpaagas sa imong mga luha, Jamaica. Sakit kaayo ang gibuhat ni Maynard kanimo. Iyang gibudhian ang inyong mga panumpa. Nagluib siya sa inyong gugma. Gipakyas niya ang iyang pasalig nganha kanimo nga iyang bangonon ang imong dungog nga iyang gipukan. Maluibon si Maynard nga walay sama.
Wala ka mahimutang human mo masayri nga magpakasal si Maynard ngadto sa laing babaye. Nangita ka gayod og paagi nga magkasulti kamo. Gusto kang mangayo og katin-awan gikan kaniya. Gusto mo siyang sudyaan sa iyang pagluib sa inyong relasyon.
Tuod man, nagkasulti gayod kamo si Maynard, Jamaica. Pinaagi sa panabang sa imong higala nga si Fe, nagkatagbo ang inyong dalan sa Marcelo Beach. Dihang nagka-atubang na kamo, gisugat mo siya sa usa ka makusog nga tamparos. Namula ang aping ni Maynard nga naigo sa imong tamparos apan wala siya mosukol.
"Hudas kang dako, Maynard," giingnan mo siya. "Nganong nakaako ka man pagbudhi nako? Nganong si Casilda man ang imong pakaslan?"
"I'm sorry, Jamaica," matud ni Maynard. "Apan mao kini ang nakab-ot kong desisyon. Kinahanglang praktikal na ta karong panahona."
"U-unsay buot mong ipasabot?"
"Dili akoy nakauna sa pagka babaye ni Casilda."
"Dili ko interesadong masayod niana."
"Kinahanglang masayod ka niini aron imong masabtan kun nganong siyay gipili ko nga pakaslan." -- Sumpayan pa
