Natapos na  ang tanan

Nagtungok si Barad sa sulod sa iyang selda. Bag-o lang nga  mibiya  kaniya ang    iyang pamilya. Ingon sa dili gihapon siya makadawat sa  nahimong  desisyon  sa korte saiyang kaso.

Wa gyud magsilbi ang binandol nga kuwarta nga gipalihok aron maabsuwelto sa kasong pagpusil-patay sa usa ka inilang mediaman sa Manila. Nahukman gyud siya sa huwes nga sad-an ug lethal injection ang sentensya niya!

Nakapanglingo si Barad. Gihamok siya sa kahasol. Nagtuo siya nga sama sa daghan na niyang pagpusil-patay sa mga tawong iyang gikasilagan, makalusot gihapon siya sa ngipon sa balaod.

Daghan ang mibasol kaniya, ngano nga maoy nangunay sa pagbuhat sa krimen, nga unta, daghan man siya og mga bata-bata nga maoy kasaligang mohimo sa maong salaod.

Haruhay ang kahimtang ni Barad sa Manila. Ilado siya. Daghan siya og mga sakop. Paspas ang iyang pag-asenso. Palusot sa shabu ang iyang trabaho. Binulto. Right hand siya sa usa ka dakong drug lord. Daghan siya'g kailang mga polis nga maoy nahimo niyang protektor sa ilegal niyang panginabuhian. Mao nga way sabit ang iyang negosyo. Suod usab niya si Redo, inilang mediaman nga maoy tigdepensa kun adunay mabulilyaso sa uban niyang mga sakop sa palusot nga shabu.

Sa kadugayan, dagkong kantidad na nga kuwarta ang pangayoon ni Redo sa sindikato sa droga. Mimando ang agalong drug lord ni Barad kaniya. "Hatagan og kataposan ang mga adlaw sa maong mediaman...!"

Nakahukom si Barad nga siya’y mangunay sa pagkulot sa kinabuhi ni Redo, bisan pa man nga dunay miboluntaryo sa iyang mga sakop. Migilok sab ang iyang mga kamot nga naadik na sab sa pagpamusil og tawo. Tuod man, milampos si Barad sa pagkutlo sa kinabuhi sa mediaman. Apan wa siya magdahom nga may lig-ong mga testigo nga nakakita sa krimen ug mibarog batok kaniya. Gidakop siya. Gipriso ug gipasakaan og kasong pagpatay.

Way epekto ang binandol nga salapi gikan sa iyang drug lord nga agalon. Mao lagi nga wa gyud damha ni Barad, ingon man sa iyang pamilya ug kaparentihan nga mahukman siya sa silot nga kamatayon. Nagtuo gyod siya nga natuman  na ang tanan niyang pangandoy ug natapos na ang tanang babag sa nasudlan niyang ilegal nga panginabuhian.

Nangagho si Barad nga mipasiklap sa kaubanan niyang mga priso sa sulod sa selda, nga nagkalingaw sa pagpaminaw sa mga mamumulong sa gipahigayong Siete Palabras sa kahanginan diha sa nagtokar nga transistor radyo. Nahinuklog si Barad nga nagpalandong. Ulahi na ang pagbasol! Ulahi na ang paghinulsol! Naglingolingo siya nga miduko.

"Diyos ko, natuman na ang hukom sa korte kanako! Matapos na ang akong pagkadaotan pinaagi sa lethal injection...!" sa unang higayon, nauyog ang abaga ni Barad nga mibakho sa tuman nga pagbasol. (Kataposan)