Dugos Ni Eva

Gula 280

Wala ko magdahom nga magkakita kami si Carlo sulod sa simbahan. Nakigsulti siya kanakog makadiyot. Nasayran kong migawas diay siya sa seminaryo dihang iyang nasayran nga nadakpan ang iyang amahan nga si Mr. Prax Vidoya ug nag-atubang na kini karon og mabug-at nga kaso sa korte. Dugay na kuno siyang nangita nako.

“Mabdos ka na diay?” Gipasiplatan niya ang akong tiyan.

“Akong childhood sweetheart maoy amahan niini,” laktod kong tubag.

“Good luck ninyong duha.”

Tungod sa panagkita namo ni Carlo,nakahukom kong mopauli na lang sa Bohol uban kang Rodney. Misugot dayon si Rodney dihang ako siyang gisultihan sa akong hukom. Mi-resign siya sa iyang trabaho. Namauli kami sa Bohol.

Sa among paghibalik sa among lungsod sa Mabini, mora kog nabag-ohan sa atmosphere. Nahinangop ang akong mga higala nga dugay nang wala makakita nako. Didto na ko mopuyo sa balay nilang Rodney. Mahinangpong midawat nako ang iyang inahan.

Daghan diay ang nahitabo sa akong pagbiya sa Mabini. Si Papa Segundo gidala na sa Muntinlupa human masentensiyahi sa korte nga mabilanggo sulod sa dose ka tuig tungod sa pagpatay niya sa amahan ni Rodney. Nasayran ko usab nga si Mama Betty atua sa Mindanao. May ka-live in kuno kining ex-convict ug kanunay kulatahon sa salbahis ang akong inahan.Pero morag wala ko matandog sa maong kasayoran.

Nasayran ko usab nga wala na si Padre Dick sa among lungsod. Gipetisyonan kini sa mga parokyano sa Mabini human magbinastos ngadto sa mga estudyante sa hayiskol nga mitambong sa gi-officiate niyang Life and Spirit Seminar.

Apan ang wala gyud nako damha mao ang kapalaran nila ni Helen ug Leroy. Nangulitawo si Leroy nako kaniadto sa hayiskol pa mi. Nagkarelasyon usab si Helen ug Rodney samtang didto ko sa Cebu. Apan sila si Helen ug Leroy ang nagkadayon. Nagsabak na gani si Helen sa una nilang liwat. Sa akong bahin, wala ko magmahay sa akong kapalaran. Malipayon ko sa kiliran ni Rodney. -- Kataposan