Dugos ni Eva

Wala ko makabalibad sa gihangyo ni Rodney. Unsaon ko pagbalibad nga mopatara man gani ko bisan walay gikasabotan nga kondisyon? Karon na kaha nga nadawat siya sa trabaho nga iyang giaplayan?

Mao nga birada taman sa ginhawa si Tsong. Bahalag mangaungas. Total, gikalipay ko man usab ang iyang gibuhat. Dili mahubit sa pulong ang kalalim nga akong bation kanang mosulod na ang kargada ni Rodney sa akong lapsanan. Labi na gyud kun magnukosnukos na kini sulod sa akong pagka babaye.

Milabay ang unom ka bulan. Nagsugod nag busyad ang akong tiyan sa bata nga akong gisabak. Mao kini ang unang bunga sa gugma namo ni Rodney. Nagplano ming magpakasal aron madawat ang blessings sa kahitas-an apan magtigom pa kamig kuwarta. Nagpadayon si Rodney pagtrabaho sa fastfood chain nga iyang gialagaran.

Inanay ko nang nahikalimtan ang nightmare nga midangat sa akong kinabuhi. Nakasugod na kog bag-ong kinabuhi uban kang Rodney. Nanghinaot ko nga wala na untay laing mabug-at nga pagsulay nga modangat sa akong kinabuhi.

Nabalitaan ko nga gisugdan na ang pagbista sa kaso nga giatubang ni Mr. Prax Vidoya. Giampo ko sa Kahitas-an nga unta makakab-ot ang tanang naagrabiyado sa iyang illegal nga negosyo sa hustisya nga ilang gipangita.

Usa ka adlaw’ng Biyernes niana, nag-inusara kong misimba sa Sto. Niño. Maoy akong plano nga inighuman nakog simba, mohapit na lang ko sa fastfood chain nga gitrabahoan ni Rodney aron magdungan na lang kamig pauli sa Inayawan.

Mitambong ko sa santos nga misa. Maduloton nga namati sa homiliya sa pari. Human sa misa, minunot ko sa panon sa katawhan nga naghuot sa pag-ilogay paggawas sa ganghaan sa simbahan. Misamot ang kahuot sa ganghaan kay mosugat man ang mao pay pagsulod nga mga manimbahay. Miuliot ko paingon sa gawas. Diriyot ko madasmagi sa usa ka lalaki nga akong gikasugat. Ug nakugang ko dihang ako siyang nailhan. Si Carlo! -- Taposon sunod gula