Sex slave

Gula 64

Dihang nakabiya na si Leemar, gibalik nakog tak-op ang sera sa pultahan. Mihigda ko sa kama ug giumod ang akong nawong sa unlan. Wala ko makapugong sa paghilak. Mao pa ganiy pagbiya ni Leemar apan gimingaw na ko niya.

Tungod kay nag-inusara na man lang ko, nakahukom kong mopauli sa Leyte. Si Charlotte ang misantop dayon sa akong hunahuna. Mobalik ko sa iyang gipuy-an. Mamasin ko nga makadawat pa ang tomboy nako bisan pa man sa akong pagbiya niya. Wala na koy laing nahunahunaan nga kadangpan gawas kaniya.

Nianang pagkagabii, misakay dayon ko’g barko paingon sa Ormoc. Alas tres sa kaadlawon midunggo na ang barko. Gipaabot ko una nga mohayag ang kalibotan. Untop alas singko mikanaog ko sa barko. Midiretso ko sa gipuy-an ni Charlotte. Nakugang siya sa akong pag-abot. Apan nalipay ko nga wala siya masuko nako. Nahinangop siya sa akong pagbalik.

“Pasayloa ko, Charlotte,” matud ko.

“Wa kay angay pangayoan og pasaylo, Bonita,” ni Charlotte pa. “Nalipay ko nga mibalik ka kanako.”

Gipasabot nako si Charlotte nga maong napugos ko pagkuyog ni Leemar ngadto sa Cebu kay nagsabak ko sa among anak.

“Giingnan ko na bitaw ka nga buwagi si Leemar kay problema ray iyang ikahatag nimo,” matud ni Charlotte. “Tan-awa...di ba igo ka lang niyang gipaangkan?”

“Wa ko magbasol sa nahitabo namo ni Leemar,” giingnan ko siya.

“Ang nakadaot ninyong mga babaye kay ilaronon ra mo sa mga lalaki.”

Wala na lang ko motubay sa gisulti ni Charlotte. Dili ko gustong mosangko sa panaglalis ang among panagsulti. Dili ko gustong magkairgo kami.

Milabay ang unom ka bulan. Nag-anam na’g busyad ang akong tiyan. Usa ka hapon niana, mipauli si Charlotte sa among gipuy-an nga masulob-on kaayo ang nawong. Nagsusi ko kun may problema  ba siya. Iya kong gitug-anan nga natangtang siya sa iyang trabaho. -- Sumpayan pa