Sex slave

Gula 63

Human kami magkasultig maayo, gipanghipos na ni Leemar ang iyang mga butang. Nasuta ko nga andam na gayod siyang mobiya nako.

“Ugma sa buntag molakaw kog sayo,” matud ni Leemar human makapanghipos. “Molahos pa ko sa gipuy-an ni Ashley sa Mandaue. Gikan didto, mo-report ko sa trabaho. Unya makigkita ko sa among manager aron i-submit ang akong resignation letter kay mopauli na ko sa Ormoc uban sa akong asawa.”

“Ikaw ang mag-igo,” giingnan ko si Leemar. “Ug pag-ayoayo.”

“Ikaw sab...pag-ayoayo ilabi na nga mag-inusara ka na lang dinhi. Mas maayo tingaling mopauli ka na lang usab ngadto sa Leyte.”

“Unya ko na kana hunahunaa kun wala ka na.”

Nag-anam nag kalawom ang kagabhion maong nanghigda na kami. Nagtupad kami sa kama apan gitalikdan ko siya. Mipaduol siya nako. Iya kong gigakos. Gusto unta niyang among saw-an pagtagay ang dugos sa lawasnong kalipay apan gibalibaran ko siya.

“Dili ko gustong angkonon mo pa gihapon ang akong pagka babaye,” matud ko. “Tingalig mingawon kog maayo nimo kun may mahitabo kanato karon ug unya mawala ka na ugma. Dili ko gustong masakitan pag-ayo, Leemar.”

Wala mamugos si Leemar. Apan naggakos ming nangatulog hangtod sa kabuntagon.

Pagmata namo, si Leemar ang nangunay paghikay sa among pamahaw. Human sa pangaon, may gitunol siya nakong kuwarta. Mibalibad ko apan gipugos ko niya pagdawat.

“Dawata kini, Bonita,” niya pa. “Gikinahanglan mo kini samtang nia ka sa siyudad. Ayaw kini balibari. Kinasingkasing ko kining ihatag nimo.”

Gidawat nako ang kuwarta. Unya nagpanamilitay na kami si Leemar. Naghinilakay ming duha sa kawili sa usag-usa. Sa kataposang higayon, gigakos ko si Leemar og hugot kaayo. Kanang gakos nga tugob sa kawili.

“Ipangumosta na lang unya ko sa imong asawa,” matud ko. “Ingna siya nga gusto kong pangayoon ang iyang pasaylo.”

“Makalaom ka,” matud ni Leemar dayong talikod ug hoyhoy ang iyang mga abaga nga migawas sa pultahan sa lawak. -- Sumpayan pa