Dugos Ni Eva

Gula 277

Pag-abot namo sa buhatan sa kapolisan sa dakbayan sa Sugbu, gipatubag ko ni SPO4 Cruz og pipila ka pangutana. Gipasabot ko siya sa hinungdan sa akong paglayas sa panimalay ni Mr. Prax Vidoya. Gisultihan ko usab siya nga dili tinuod ang gipasangil ni Mr. Vidoya nga nangawat kog kuwarta ug mga alahas.

“Dili ka ba lang mopasakag kiha ni Mr. Vidoya, Miss Adami, tungod sa iyang paghatag og puwerhisyo sa imong kinabuhi?” Gipangutana ko ni SPO4 Cruz.

“Dili na lang, Sir,” nako pa. “Dili ko gusto’g samok. Gusto na kong magmalinawon  ang akong kinabuhi. Igo na nga nadakpan si Mr. Vidoya.”

Unya si Rodney na usab ang gisukitsukit sa hepe. Hanas kaayo si Rodney nga nangatarongan atubangan sa polis. Natubag niya ang tanang mga pangutana ni SPO4 Cruz. Nagpasalamat ang polis nga mikooperar mi sa ilang imbestigasyon.

Gabii na ming nakagawas sa buhatan sa kapolisan. Midiretso mi sa gipuy-an sa iyaan ni Rodney sa Inayawan. Nakugang ang tanan sa among pag-abot. Gisuginlan sila ni Rodney sa tanang mga panghitabo aron makasabot sila. Mikalma dayon ang tanan human sila suginli ni Rodney sa among pagtago-tago aron paglikay sa mga tawong nangita nako hangtod nga naabot mi sa bukirang bahin sa lungsod sa Balamban diin didto usab madakpi si Mr. Vidoya ug ang iyang mga sakop sa kapolisan. Nalipay na ang tanan nga nalutsan ko na ang suliran nga akong giatubang.

“Dili ka ba diay mokiha sa upat ka lalaki nga nag-gang rape nimo?” Sukit ni Rodney dihang namahulay na mi sulod sa lawak. “Nakaseguro ka man kaha nga kadtong upat ka lalaki nga imong nakita nga gi-flash sa TV maoy nag-rape nimo?”

“Nakaseguro ko,” nako pa. “Pero maglikay na lang ko sa eskandalo. Total, nag-atubang na man sila karon og bug-at nga kaso. Pero wala ko magdahom nga mga sakop diay sila ni Mr. Prax Vidoya.”

“Unpredictable gyud ang tawo, Eva,” ni Rodney pa.

Pagkataudtaod, mikalit lang og bale ang  tuyok sa kalibotan. Nanimahong lovemaking ang among kuwarto.-- Sumpayan pa