Dugos ni Eva

Sulod sa langob nga among gitagoan, nagpaminaw lang mi si Rodney sa gipanagsultihan nila ni Mr. Prax Vidoya ug SPO4 Cruz.

"Sa unsang hinungdan nga inyo kaming dakpon, SPO4 Cruz?" Sukit ni Mr. Vidoya.

"Nasayran na namo nga  ikaw usa ka drug lord ug maoy tag-iya sa mega shabu laboratory nga among nadiskobrehan," padayag ni SPO4 Cruz.

"Binuang," mibuto sa kasuko si Mr. Vidoya. "May kamatuoran ba kamo o kaha ebidensiya nga makapalig-on nianang inyong gipasangil kanako?"

"Mitug-an na sa tinuod ang imong mga tawo nga among nadakpan, Mr. Vidoya," nagkanayon si SPO4 Cruz. "Ang upat namo ka dinakpan mitumbok kanimo nga usa ka drug lord ug maoy ilang amo. Labaw sa tanan, ilang gitug-an nga ikaw ang tag-iya sa mega shabu laboratory nga among nakaplagan."

Niining tungora, inanay'ng nasuta namo ni Rodney nga morag luwas na mi sa peligro. Mihinay mig paduol sa baba sa langob. Pero nag-amping ming dili makit-an sa mga tawo ni Mr. Vidoya. Nagpasalipod mi sa nag-igdal nga bato ug naniid.

"Ampo nga malinawon, Mr. Vidoya," ni SPO4 Cruz pa.

"Dili ko moampo ninyo," nagkanayon si Mr. Vidoya.

Usa sa iyang mga sakop ang mopusil unta ni SPO4 Cruz. Apan unang nakapabuto si SPO4 Cruz. Ang mga kaubang polis ni SPO4 Cruz nagtion sa ilang mga armas ngadto sa mga tawo ni Mr. Vidoya. May polis usab nga nagtion kang Mr. Vidoya. May mga kauban pa gyod si SPO4 Cruz nga nanggawas gikan sa kasagbotan ug nagtion usab sa ilang mga armas ngadto ni Mr. Vidoya ug sa iyang mga sakop.

"Mobanaw ang daghang dugo kun magmagahi ka, Mr. Vidoya," ni SPO4 Cruz pa.

Nakakita tingali nga wala silay dag-anan, wala na mopakitag daotang lihok si Mr. Vidoya ug ang iyang mga sakop. Kadali ra silang naposasan sa mga polis. Nanggawas dayon mi si Rodney sa among gitagoan. (Sumpayan pa)