Sex slave

Gula 60

Misugod dayon si Leemar sa iyang trabaho pagkaugma. Nasayran ko nga na-assign siya sa foodcourt sa usa ka iladong mall sa dakbayan sa Sugbu. Siya’y tig-mop sa salog sa palibot sa foodcourt sa maong mall.

“Kumosta ang imong trabaho?” Gipangutana ko siya sa iyang pagpauli nianang pagkahapon. “Nakauyon ka ba?”

“Nakauyon ko sa akong trabaho,” laktod nga tubag ni Leemar. “Dili man sab kaayo hago kay daghan man mi nga na-assign sa food court.”

“Kun suweldohan na unya ka, atong iuli ngadto sa imong asawa ang salapi nga halin sa inyong baboy.Ipadala lang nato sa fast courier.”

“U-unsa? Apan ngano man?”

“Dili ko gustong mahurot natog gasto kanang maong kuwarta. Gikinahanglan kana sa imong pamilya nga nahibilin didto sa Ormoc.”

“Dili, Bonita. Dili nako iuli ang maong kuwarta tungod kay may katungod usab ako sa paggasto niini. Naggikan sa akong suweldo sa akong pagtrabaho didto sa Ormoc ang gipalit sa lawog sa among mga baboy.”

Wala na lang ko magtingog. Dili ko gustong mosangko pa sa panaglalis ang panagsulti namo ni Leemar. Gisunod ko ang iyang kagustohan.

Nanglabay ang daghang mga adlaw. Nagpadayon si Leemar pagtrabaho sa UCV General Services. Matag tingsuweldo, iintrigo gayod niya kanako ang iyang suweldo. Ako nay iyang gisaligan sa pag-budget alang sa among inadlaw nga panginahanglan.

Usa ka adlaw niana, dugay’ng nahiuli si Leemar. Nabawo ko’g pinaabot niya. Miuna na lang ko’g panihapon niya kay gigutom na ko. Lapas na sa alas nuybe siyang nahiabot. Nakamatikod ko nga nagmasulob-on ang iyang nawong.

“Nadugay ka man?” Gipangutana ko siya.

Wala siya motingog. Igo lang nanghupaw og lawom kaayo.

“May problema ba?” Laing pangutana gipasupot ko kaniya.

“Nakasugat ko’g kakulian,” laktod niyang tubag.

“U-unsa nga kakulian?” -- Sumpayan pa