Dugos Ni Eva
Gula 274
Misamot ang kakuyaw nga akong gibati sa gisulti ni Rodney. Nganong may mga polis man nga nahiabot sa dapit nga among nahimutangan?
“Nganong miabot man ang mga polis dinhi?” Gipangutana ko si Rodney. “Unsa may ilang tuyo sa pag-anhi ning dapita?”
“Wala koy ideya kun nganong may mga polis man nga miabot dinhi, Eva,” ni Rodney pa. “Naglibog gani ko kun nganong nahiabot sila dinhi?”
“Dili kaha sila mga tawo usab ni Mr. Vidoya ug mianhi sila aron makatabang pagdakop nako?”
“Ambot lang, Eva. Pero...relaks lang una. Maniid lang ta kun unsay sunod mahitabo. Dili lang gyud ta mogawas dinhi sa atong gitagoan.”
Naniid mi sa palibot sa gawas sa langob.
“Maayo kay nahiabot kamo, SPO4 Cruz,” nadungog namo gikan sa gawas sa langob ang tingog ni Mr. Prax Vidoya. “Tabangi mi sa pagdakop sa akong katabang nga si Eva Adami. Milayas siya sa akong panima’y dala ang daghan kong kuwarta ug mga alahas. Dugay ko na siyang gipapangita sa akong mga sinuholan. Apan karon na-corner na gyud namo siya ug ang kauban niyang lalaki. Naa sila sa sulod sa langob. Dakpa ninyo sila, SPO4 Cruz. Mandoi na ang imong mga tawo pagsulod sa langob.”
Nagkatinan-away mi si Rodney sa among nadungog. Ang hayop nga Mr. Vidoya. Gibutangbutangan ko niya’g sala. Bakakon siyang dako.
“Dili sila’y among tuyo sa among pag-anhi sa bukid, Mr. Vidoya,” nadungog namo ang tingog sa
“U-unsay buot mong ipasabot, SPO4 Cruz?” Tingog ni Mr. Vidoya.
“May dala kaming warrant of arrest alang kanimo, Mr. Vidoya,” tingog ni SPO4 Cruz. “Nia kami aron pagdakop kanimo ug sa imong mga tawo.”
“U-unsa?” May kalagot ang tingog ni Mr. Vidoya.-- Sumpayan pa
- Latest
- Trending
