Sex slave

Gula 58

Pasado alas diyes ang takna nahibalik si Leemar sa hotel nga among giistaran. Iya kong gibalitaan nga nakakita na siya’g balay nga among kapuy-an. Usa lang ka kuwarto ang iyang giabangan apan kini hamugaway alang namong duha. Mihatag na kuno siya’g pasiunang bayad ngadto sa tag-iya sa maong balay.

Nanghipos dayon mi sa among mga gamit. Pagkahuman, mi-check out na kami sa hotel. Nagpahatod mig taxi paingon sa barangay Guadalupe diin nahimutang ang balay nga among puy-an. Sudlonon ang dapit nga nahimutangan sa balay. Pag-abot namo sa luyo sa simbahan, misimang mi sa usa ka gamay nga eskinita. Mihunong mi tungod sa usa ka balay nga may habog nga koral sa semento.

“Kini na ba?” Gipangutana ko si Leemar.

“Mao na ning dapita,” matud ni Leemar. “Mosubay kita nianang gamay’ng dalan nga naa sa kilid sa koral. Luyo nianang kinoral nga balay mao na ang balay nga atong puy-an.”

Miuna kog kanaog sa taxi samtang gibayran pa ni Leemar ang driver. Pagkahuman, nangadto na kami sa balay nga among puy-an dala ang among mga bagahe. Sa among pag-abot, gipahimutang dayon namo ang among mga gamit.

“Nakauyon ko ning dapita, giingnan nako si Leemar.

“Gipili ko kini kay way samok,” matud ni Leemar. “Maayong pagkapuwesto. Dili ta daling matultolan dinhi. Labaw sa tanan, way nakaila  nato.”

Wala ko motingog. Takulahaw lang, misantop sa akong hunahuna ang asawa ug mga anak ni Leemar nga iyang gibiyaan didto sa Ormoc tungod nako.

“O, ngano bang mikalit man paglamugdong ang imong dagway?” Sukit ni Leemar nga mitutok nako. “May problema ba?”

“Wa man,” matud ko. “Naghunahuna lang ko nga dako na kaayo kog atraso sa imong pamilya. Tungod nako giabandonar mo sila.”

“Ayaw na lagi sila’g hunahunaa.”

“Dili ko makalikay sa paghunahuna, Leemar. Babaye sab ko. Nasayod ko kun unsa kasakit ang gibati karon sa imong asawa. -- Sumpayan pa