Cangyan, Carmen, Cebu
Nganong imo mang itupo si Zeny nako? Mahug ra god nag ig-agaw nato! bagolbol ni Greg ngadtong Pat iyang ig-agaw. Nia sila sulod sa diskohan nga kinoral sa baryo Sangi. Nagbarog sila nga gasal-ig sa koral nga guod. Ang mga dalaga nanglingkod sa taas nga lingkoranan nga hinimo sab sa guod.
Gipasiugdahan ning diskoha alang sa kasaulogan sa Valentine's Day. Youth Organization sa Sangi ang nagpasiugda. Wala ni sa Malbog kalihukana. Busa bisag layo, 7 kilometros ang distansiya gikan sa Malbog, niadto ang manag-agaw nga Pat ug Greg sa pagbaklay aron lang katambong sa disko. Ganado si Pat kay may uyab na man daan siyang kasabot. Si Myrna nga ig-agaw gihapon ni Zeny. Si Greg nikuyog ni Pat kay mosuroy sab.
"Kuyog man god na siyang Myrna. Di ko kalugar ug tsansing ni Myrna kun naa pirmi si Zeny sa iyang duol. Gusto nako nga ikaw say mo-"man" anang Zeny," pasabot ni Pat.
Puro bakasyonista si Pat ug Greg sa lungsod sa Alegria. Nipuyo silas baryo Malbog sa balay sa iyang uyoan nga si Ador, drayber og tourist bus. Si Pat anak ni Nena nga maguwang ni Ador. Si Greg anak ni Dencio nga maguwang ni Nena. Si Zeny anak ni Mina nga igsoon ni Julie asawa ni Ador. Si Myrna anak sa laing igsoon ni Julie.
Dinhi sa Alegria natawo si Pat ug Greg. Apan pag-edad nilag sayis anyos nibalhin silag puyo sa Kamputhaw ning dakbayan. Pareho silang bugtong anak. Ang mga ginikanan ni Pat parehong magtutudlo ug nabalhin ang assignment sa siyudad. Ang mga ginikanan ni Greg nagtrabaho sa opisina sa Tasador. Ug nabalhin ilang assignment sa Kapitolyo. Maong tagasiyudad na gyud ang duha ka ulitawo.
Nakahuman na og kursong Accountancy si Pat ug nakakuha na og board exams. Si Greg nakahuman og Nautical. Pagkatapos og duha ka tuig nga pagka-agregawo, nikuha sab og board exams. Naghulat silang duha sa resulta sa ilang mga board exams. Samtang naghulat, namakasyon sa probinsiya. Si Pat kay hapit kada semana tig-anhaan sa balay sa ilang uyoan, nakabarkada og mga taga-Malbog. Ug nakauyab na gyud sab ni Myrna nga taga-Malbog.
Si Greg tinuig ang iyang pag-anha sa Malbog. Gikan sa elementarya pa siya hangtod sa hayskul, tigbakasyon siya sa Malbog. Tumong sa long summer vacation, kanang inig sera sa klase. Nakaduladula niya si Zeny. Dose anyos pa kaniadto. Sip-onon pa. Si Greg kinse anyos pa kaniadto. Kanunay silang magkuyog sa baybay. Kun di manginhas, mamasol o manakayan.
Karon, nakahuman na si Zeny og kursong Secretarial. Ug kasamtangang nangaplay og trabaho sa opisina sa mayor. Dili gyud diay maseguro ang hitsura sa babaye gikan sa pagkabata hangtod sa pagkadalaga. Wa guwapahi si Greg ni Zeny sa bata pa. Karon nga disinuybe na, nibukhad na ang hustong pagkabulak, hapit wa na siya kaila niini.
"Pasensiya ka na Zen ha. Morag sulawan na man ko karon sa imong kaanyag. Mataha na man ko nimong magduolduol. Di man pareha kaniadto nga mga bata pa ta. Karon mahadlok ko nga basig masuyaan unya kos mga ulitawo dinhis Alegria. Pareglahan unya ko," ni Greg dihang nagkabayle silag sweet music. Nipahiyom lang si Zeny.
"Halos parente man nako ang tanang mga ulitawo sa ato. Di man sila mangigi. Kay para man gyud sa laing tawo ang pakigrelasyon. Di man maayo mag-unay ang mag-agaw," ni Zeny.
"Kita? Di diay ta ig-agaw?" ni Greg.
"Ig-agaw mo ni Ian anak ni Tiyo Ador sa habig ni Tiyo Ador. Kami si Ian, ig-agaw mi sa habig sa Tiya Julie kay magsoon man among masigka inahan. Apan kita, wala may relasyon sa dugo. Dili ta kadugo," ni Zeny. Nakapahiyom si Greg. Wa kamatikod nga nahuman ang tukar.
Alas dose na sa tungang gabii nahuman ang disko. Mamauli na sila. Magbaklay gihapon. Nigawas na sila sa diskohan. Nagbarog ang duha ka ulitawo daplin sa karsada atbang sa usa ka tindahan."Karon gaw. Magpanagana ka pa ba sa pag-"man" ni Zeny?" ni Pat dungan ang pag-agbay sa ig-gaw.
May gihapit sa tindahan si Myrna ug Zeny. Nihangad si Pat.
"Hayag ang buwan, gaw. Ug dunay bitoon nga nagpaduol. Busa, layo rang kapakyasan kun modiskarte kang Zeny. Kay gilakad na nako ni Myrna nga ilakad sab ka ngadtong Zeny," ni Pat.
"Ikaw gyud, gaw, maayo gyud kang himoong matchmaker. Kupido," ni Greg nga nagpahiyom. (Kataposan)