Mituman

Gikan sa may terasa, nalingaw si Amanda nga nagtan-aw sa bag-ong sulogoon nga si Loloy. Nagbisibis kini sa mga tanom sa harden sa hamugaway nilang panimalay. Nahimuot siyang naghunahuna sa kakugi nga gipakita ni Loloy.

Kagahapon pa mi-aplay og trabaho isip usa ka sulugoon si Loloy. Taga probinsiya kini. Tersero grado ra gyod ang nahuman niini tungod sa kakabos. Mao nga inosente kaayog lihok ug sinultihan si Loloy. Mabaw rag salabotan. Apan gidawat dayon kini ni Amanda pagka sulogoon kay iyang namatikdan nga buotan kini.

Human kabisibisi og tubig ang mga tanom sa garden, maoy gisunod ni Loloy paglimpiyo ang duha ka sakyanan nila ni Amanda nga nagpundo sa garahe. Gibansawan kinig maayo ni Loloy aron matangtang ang mga abog. Misamot ang pagdayeg ni Amanda sa gipakitang mga lihok ni Loloy.

Nag-inusara nga namahaw si Amanda. Ang iyang bana nga si Felimon natulog pa. Hingatulgon kaayo si Felimon. Sagad udto na kining momata.

"Dinhi ka lang sa balay, Loloy," matud ni Amanda human makapamahaw. "Aron may kauban si Sir Felimon nimo. Pasagdi lang siya nga natulog. Ayaw gayod siya  pukawa. Kasabot?"

"Oo, Ma'am," mitando si Loloy.

"Kun magmata na siya ug mangita nako, ingna lang nga nag-mahjong ko sa Casino Regal. Ug kun may problema mo dinhi, agpasa lang ko didto. Duol ra man ang maong casino dinhi. Puyde man ganing baktason."

"Oo, Ma'am. Nakatultol man sab ko nianang imong giingon nga Casino. Nalabyan man na nako sa akong pagpaingon dinhi kagahapon."

"Maayo hinuon aron imo dayon kong mapahibalo kun adunay problema dinhi sa balay. Basta pasagdi lang gyod ang imong Sir Felimon nga natulog bahalag unyang hapon na kana siya momata."

"Areglado, Ma'am," pasalig ni Loloy.

Sa casino, nalingaw pag-ayo si Amanda. Ingon sa gidebuynas ang iyang adlaw kay mao pa ganiy iyang pagsugod nakadaog man dayon siya. Sagunson ang iyang pagdaog. Busa madasigon kaayo siyang nakigsugal uban sa sama usab kaniyang mga asawa sa mga tawong dagkog tinai. Dili man sab hibentahaan si Amanda sa maong mga babaye. Usa ka taas nga kawani sa usa ka ahensiya sa kagamhanan ang iyang bana nga si Felimon.

Mipadayon si Amanda sa pagsugal. Sukad kaganina sa iyang pagsugod wala pa gayod siya makatilaw og pilde.

Apan kalit miabot si Loloy sa casino ug nagdala sa daotang balita  alang kang Amanda.

"Nasunog ang balay, Ma'am," ni Loloy pa.

"Unsa?" Nakugang si Amanda. "Sir Sir Felimon nimo, hain man?"

"Tua sa balay akong gibiyaan kay natulog pa."

"Wa diay nimo pukawa?'

"Nagtugon ka man nga pasagdan lang siya nga natulog. Mituman ko sa imong tugon maong naneguro na lang kog sibat dihang dako na kaayo ang kayo."

Nahugno si Amanda sa iyang nadungog. (Kataposan)