Tango sa kilat

Si Kando ug ang iyang asawa nagpuyo sa bukirang bahin ug nag-ugmad sa gamay nilang banika bisan paman sa kalisud nga ilang nasinati wala gyud magpatental si Kardo sa mga dautang buhat.

Nanginabuhi si Kando sa tinarong nga paagi uban sa iyang asawa. Duna silay binuhi nga kabayo, daku og ikatabang kaniya ang iyang kabayo kay mao kini iyang sakyanan paingon sa patag kun mamalit sa ginagmay nilang konsumo ug kinahanglanon matag semana.

"Day andama ang akong dad-onon kay molugsong ko karon sa patag," pulong pa ni Kardo ngadto sa iyang asawa ug iya usab gilawgan ang alaga niyang kabayo.

"Dong Kardo andam na ang tanan." Tayming usab nga nahumnan na og kaon ang iyang kabayo ug wala maglangay si Kardo migikan gilayon siya lugsong paingon sa patag.

Lima ka oras ang latason ni Kardo una pa siya maabot sa patag. Puno sa pagpangaliya ang gihimo ni Kardo. Sa wala pa siya nakapadagan sa iyang kabayo iyang gipangayo sa Kahitas-an nga wala untay mga katalagman nga modangat sa iyang paglabay sa agianan paingon sa patag. "He heya," migikan na si Kardo misugod na sa paghunat og dagan ang gisakyan niyang kabayo.

Ug kalit lang mikisdom ang kalangitan ug mitabon ang mabagang panganod inubanan sa pagpangilat-kilat nabalaka si Kardo nga mobunok ang makusog nga ulan. Gipakusgan pa niya ang pagdagan sa iyang kabayo, he heya".

Wala magdugay mibunok gyud ang kusog nga ulan nabalaka si Kardo nga dili siya mahidantol sa patag. Kalit lang mihaguros ang makusog nga ulan ug mikilat ug na-igo ang lubing limbaon. Nasaksihan ni Kardo ang maong hitabo. Daw sama sa kuryente nga miputos sa punoan sa lubi ug kalit lang nahagsa sa atubangan ni Kardo nga ning ali sa iyang agianan, kalit niyang gipahunong sa pagdagan ang gisakyan niyang kabayo. "Ho ... ho... ho..."

Hilabihang kurata ang gibate ni Kardo naputos sa kinit-kitan ang punoan sa lubi ug iyang nasiplatan sa iyang panan-aw dapit sa punoan sa lubing limb aon may nag-asoaso ug "nagbaga" pa kini bisan paman sa makusog nga ulan nga midagayday sa punoan niini.

Ninglayat si Kardo sa kabayo ug mipaduol sa punoan sa lubi. Nakita niya ang nagbaga porma og bangkil o tango sa iyang hunahuna.

"Mao ba kaha ni ang "tango sa kilat." Iya kining gipunit ug giputos og panapton ug gisulod sa iyang bulsa. Wala maglangay si Kardo ug nagpadayon siya paglugsong sa patag milurang na ang makusog nga ulan.

Sa paghiabot niya sa ilang balay mitikyop na ang kangitngit nagpungko siya sa ilang nataran ug iyang gikuot gikan sa iyang bulsa ang iyang napunitan nga porma og tango misilaw kini ug nagmugna og kahayag misantop sa iyang huna-huna nga bilihon kining butanga iya kining giputos og balik sa panapton giba-atan niya og naylon ug gihigot niya sa iyang hawak.

Sayo sa buntag hilabihan ka sakit ang misugat sa kabuntagon ni Kardo kay ang iyang alaga wala na mobangon ug patay na kini. Wala nay sakyanan si Kardo iya nalang baktason kun molugsong siya paingon ngadto sa patag gibati niya ang kahibulong nga dali raman siya naabot dili man maabtan og usa ka oras ang iyang pagbaktas nga kun magsakay siya og kabayo lima man unta ka oras.

Nahuna-huna niya tungod siguro sa tango nga iyang gibakos sa iyang hawak ug nagtuo siya nga "tango kini sa kilat".

Sukad niadto abtik na siya nga manglihok-lihok kontra niya ang mga badlungon sa ilang dapit kun dunay magkinahanglan sa iyang panabang kalit lang siyang mo-abot sa nagkinahanglan kaniya gitawag na siya og "Kardo ang tawong kidlat". (Kataposan)