Panadtaran, San Fernando, Cebu
Kutob sa lalaki nga makakita sa hubo nga lawas ni Ligaya dili na gyud mahinultol sa iyang trabaho kay morag dunay batobalani nga motukoy o mosuyop sa handurawan sa maong binuhat.
Kini si Ligaya mao ang bugtong anak ni Isabel-Tikyo. Ang ilang balay gilibotan sa mga dagkong punoan sa santol, mangga, nangka, abokado, kaymito ug uban pa.
Sa may punoan sa nangka dunay poso artisyano ug anha maligo si Ligaya panahon sa kagabhion. Ambot kun nganong gabii gyud ang sagad ikaligo ni Ligaya ug mahibaw-an gyud kini kay mosaba man ang manggo sa poso kun duna nay magyugyog o magtimba.
Ug natural nga motingkag dayon ang dunggan sa mga dukirokon nga mga lalaki nga ilang mga silingan ni Ligaya. Grabe gyud hinuon kaayo maligo kini si Ligaya kay way lipodlipod nga maghubo sa iyang sinina ug magluos ang panan-aw sa usa ka lalaki nga mahitabong maghupo o maniid sa pagkaligo ni Ligaya. Daghan nang nakakita sa matag kaligo ni Ligaya panahon sa gabii ug puti ra ba ang bus-ok ug lison niining lawas.
Usahay maatol nga magkatapok ang mamusohay nga mga ulitawo ug linawas gyud ang ilang nakita, natural, nga mag-iyahay na lang pod sila pagmauli kay dili na makaagwanta sa ilang gibati. Ug ang uban nga dili na gyud makaagwanta diha na lang sa nahimutangan niini ipahungaw ang dili na maagwanta niyang gibati sa iyang nakita.
Matag gabii naa sila si Berto, Rudy, Takoy, Dondon, Mario, Ben, Bobby, Junior. Hasta gani ang biyudo nga si Minggoy miapil pod og pamuso ug nahuwasan pod siya sa iyang gibati. Unya, naukay ang tibuok balangay dihang matag gabii sa Biyernes dunay mamatay nga ulitawo nga anha ra mamatay sulod sa iyang kuwarto ug ang makapahibulong kay hubo ang lawas niini nga dunay daghang samad. Ang grabe mao ang paggalhab sa tiyan niini.
“May ungo nga mangtas dinhi sa atong baryo!” milanog ang tingog ni Agustin, ang retiradong polis nga paryente sa gipatay. “Kinahanglan nga mapatay gyud ang maong mangtas nga ungo. Nganong huboan man ang balbalon nga lalaki. Pulos pa gyud nato mga silingan! Luoy kaayo sila!”
Ang biyudo nga si Minggoy nakaditik na kay morag siya na lang ang wala pa mapatay sa maong mangtas nga ungo. Nakabantay siya nga ang gipangbalbal kauban niya matag gabii sa pamuso sa hubo nga lawas ni Ligaya. Karon, nakahukom siya nga iyang panid-an ang balay nila ni Ligaya. Halawom nang gabii, mihilom siya’g adto sa balay nila ni Ligaya. Ug mao kiniy ang iyang nadungog:
“Kutob sa makakita sa hubo nakong lawas, Nay, akong balbalon ug kuhaan nakog atay ug supsopan nako sa dugo,” ni Ligaya pa ug nabati gyud kini mi Minggoy. Mikurog si Minggoy sa kahadlok apan nagpugong lang siya.
“Karong gabii, kinsay imong isunod, ha, Ligaya?” sukot sa inahan ni Ligaya.
“Akong isunod ang biyudo nga si Minggoy, kuhaon ko ang iyang kinatawo!” tubag ni Ligaya.
Midalig lakaw si Minggoy ug nangandam siya. Duna siya’y pistola nga kalibre .22 nga ang bala “silver bullet”. Tuod, pagka taotaod may nabati siyang dunay miabli sa ilang bentana. Unya iyang nakita ang bayhon ni Ligaya nga laksot na kaayo ang nawong. Siga ug pula kaayo ang mga mata niini nga mihinayhinay pagduol kaniya.
Unya wala dangtig dugay milanog tulo ka buto ang pistola ni Minggoy nga gibalahan og “silver bullet” ug may tingog sa usa ka babaye nga morag gisakitan. Natumba si Ligaya ug naghingakhingak sa kasakit. Taudtaod nakabsan kini sa iyang kinabuhi. (Kataposan)