Cawayanan, Mabini, Bohol

Wala ra makaabot sa tambalanan nabugto ang gininhawa ni Janos. Wala gayod siya makalahutay sa samad nga iyang naangkon. Gidunggab siya sa bana sa babaye nga iyang gikabit dihang naabtan silang duha nga nagtagay sa kalipay nga lawasnon ibabaw sa kama sa magtiayon.

Migawas ang kalag ni Janos sa iyang lawas. Samtang nagpautaw-utaw siya sa hangin, iyang nakita ang iyang lawas nga wala nay kinabuhi nga naghayang sa stretcher. Gustong siyang mobalik ngadto sa iyang lawas apan dili na siya makahimo.

Dili pa gustong mamatay si Janos. Nawili pa siya sa kalibotan. Gusto pa siyang magtagbaw sa mga babaye sa kalibotan. Gusto niyang matagamtam ang katam-is sa mga maanyag nga mga babaye nga iyang magustohan.

Apan nakutlo ang iyang kinabuhi sa usa ka kalit nga hitabo. Karon nga migawas na siya sa iyang lawas nga usa na ka kalag, gusto  siyang mabuhi pag-usab ang iyang lawas. Gusto siyang mobalik pagsulod niini. Apan dili gayod siya makahimo bisan unsaon siyag paningkamot. Nabatyagan hinuon niya nga ingon sa nag-anam siyag pahilayo sa iyang lawas gumikan kay daw giganoy siya sa usa ka matang sa kusog ug dili siya makatutol sa puwersa niini.

Unya mao na lamay iyang namatngonan nga gihakop siya sa nagtuyok nga buhawi. Gidala siya ngadto sa usa ka dapit nga wala pa niya masum-ok sukad masukad-morag laing dimensiyon sa kalibotan. Ang mga tawo didto daw gisapnay sa mga panganod.

Mibarog siya sa atubangan sa tawong bungoton nga nagbarog sa tungod sa pultahan niadtong dapit nga wala siya masayod kun unsa. Wala siya makasabot nganong mobarog siya sa atubangan sa tawong bungoton.

Gipakli sa tawong bungoton ang dakong libro nga gipatong sa ibabaw sa lamesang hinimo sa bulawan nga gipahimutang kilid sa ganghaan.

"Gikasubo ko," matud sa lalaking bungoton. "Wala dinhi sa libro sa kinabuhi ang imong ngalan."

Tapos niya madungog ang maong mga pulong, nabatyagan niya nga gidagit na usab siya sa makusog nga buhawi. Unya mao na lamay iyang naamgohan nga nagbarog na usab siya sa laing pultahan.

Unya ... kalit lang naabli ang dakong ganghaan. Misugat kaniya ang kangitngit nga naggikan sa sulod sa gisundan sa nagdaguok nga kalayo gikan sa sulod. Unya nabati niya ang usa ka lanog nga katawa sa usa ka linalang nga sungayan nga kalit lang mitungha sa iyang atubangan. Si Satanas!

"Dayon sa impiyerno, Janos," nagkanayon si Satanas.

"I-impiyerno?" ni Janos pa. "Impiyerno diay ning dapita?"

"Oo. Mao kini ang dapit nga alang kanimo."

"D-dili ko dinhi. Mobalik ko sa kalibotan."

"Hungog ka, Janos. Dili ka na makabalik sa kalibotan tungod kay patay ka na."

Unya dihay matang sa kusog nga mibitad kang Janos ngadto sa sulod sa ganghaan. Sa didto na siya sa sulod, nakita niya ang daghang mga kalag nga naglangoylangoy sa nag-ulbo nga kalayo.

"Sa dili pa nako barbikyuhon ang imong kalag, Janos, ni Satanas pa. "Pangayo og bisan unsa nga imong gusto kay akong ihatag kanimo."

"Ti-tinuod ka?" ni Janos nga mibatig kahinangop.

"Wala ako magtiaw. Unsa may imong pangayoon."

"Hatagig kog matahom nga babaye nga akong ikadulog sa akong pagkatulog."

Nakita ni Janos nga gituy-od ni Satanas ang mga kamot niini. Unya takulahaw lang mitungha ang maanyag kaayong babaye sa iyang atubangan. Wala maglangan si Janos. Gidala dayon niya sa sulod sa usa ka lawak ang babaye. Naghinamhinam siya sa pag-angkon niini.

Apan wala madugay migawas si Janos sa lawak nga nagpangusmo.

"Unsay nahitabo nimo, Janos?" gipangutana siya ni Satanas.

"Buysit," ni Janos pa. "Way lami. Wa man diay lungag tong babaye nga imong gihatag nako."

"Hanggaw ka man tingali, Janos," ni Satanas pa. "Nasayod ka baya nga nia kas impiyerno. Kun  atong butangan og lungag, di ba langit na kana?"

Wala makatingog si Janos. (Kataposan)