Gula 258
“Molugsong ka sa patag?” Si Rodney ang giatubang ni Iyo Andoy.
“Oo, Iyo,” tubag ni Rodney. “Mamalit ko sa among kunsomo didto sa lungsod. Ako lang unang ibilin si Eva dinhi. Mahimo ba, Iyo?”
“Nganong dili?” Sa tigulang pa. “Mahimo man gani nga anhi lang una mo magpalabay sa kagabhion unyang gabii sa dili pa kamo mopadayon sa inyong panaw. Aron ba sab makapahulay mo.”
“Dili kaha mi makasamok ninyo, Iyo?” Akoy nangutana.
“Nganong makasamok man?” Matud ni Iyo Andoy. “Bisan pinobre apan makapadayon gihapon mig mga dumuduong. Naa may usa ka kuwarto nga bakante. Gitagana gyud na namo kun dunay mahisum-ok dinhi. Kana bang mga bisita...sama ninyo...”
“Kun mao kana, Iyo,” ni Rodney pa, “moistar una mi dinhi sa imong balay. Ugma na kami mopadayon sa among panaw.”
“Kamoy mag-igo,” sa tigulang pa.
Human sa panagsabot, migikan dayon si Rodney paingon sa lungsod sa Balamban. Samtang wala si Rodney, nakigsulti nako si Iyo Andoy. Dasig siyang ikasulti. Bisan naglukdo nag pangedaron apan wala pay timailhan nga giango-ango na siya.
Udto na lang apan wala pa mahibalik si Rodney sa bukid. Layo na gyud diay sa lungsod ang dapit nga among nasum-okan kay dugay mang nakabalik si Rodney nga namalit sa among kinahanglanon didto sa poblasyon sa lungsod.
Nangagda na si Iyo Andoy alang sa paniudto. Mikaon na lang ko bisan wala pa si Rodney kay gigutom na ko. Wala ko mokaon sa linarang nga hawo kay giluod ko. Ang inasal nga langgam maoy akong gisud-an sa labo kaayong linung-ag nga ubi.
Mga pasado alas dos na dihang nahibalik si Rodney sa bukid. Nagsanuoy siya sa daghang mga pinalit. Daghan siya’g gipalit nga mga pan, sardinas ug karne norte.
“Magdugay ba ta dinhi sa bukid?” Gipangutana ko siya.
“Wa pa ko masayod, Eva,” niya pa. -- Sumpayan pa