Nahisagmuyo si Iska kay gibalibaran

Unsa pa may angay mong kasuk-an kanako, nga ang tanang halin sa isda, nga akong pinaslan ... wa na man gayod ako mangayo pa aron akong ipuhonan sa tigbakay?  nagkayuring ang tuno sa akong sinultihan.

"Ang nakaapan god nimo Iska, sobra ka ra ka dominante kanako?"

Kinsa ba god nga banaha ang dili aboton og kalibog, nga mamuwaw ako sa pagpamasol, bisan adunay hulga nga may umaabot nga bagyo, mosungasong lang gihapon ako sa pag-adto sa dagat?

Malipay na man sad god ko nga magtan-aw ni Iska nga magkinagang og baligya sa akong kuha nga pulos gayod til-ogon ning among tiyanggihan ning dakong lungsod sa San Fernando?

Sa kabag-ohay god namong nanagtipon ni Iska, isip magtiayon ning among balangay sa Lantawan, sa tanang dapit nga sama kanako nga mananagat, kami ra ang nakatukod og balay bisan gamay, pero sin ang atop?

"Siyaro sad ka Bador, bisan nag-unos ... moadto ka lang gihapon sa dagat aron mamasol??" may kayuring ang sinultihan sa akong asawa nga akong nasigpatan nga nagsul-ob sa iyang nipis nga kamison nga wa gani mag-underwear kay hilabihan man kadagtom ang iyang bilahan.

"Pamasin lang ang akoa ... Iska, basin adunay motukob nga katambak, nga kinaham kaayo nimong tuwaon!" pinaluray ang akong tingog.

Ambot unsang pagka-hitaboa, nga sa akong pagpauli, mao may akong nasiklapan ang hait pa sa suwab sa sanggot ang mata ni Iska? Makadaghan ko balika og pangutana unsay hinungdan sa iyang kasapot nga hapit na man lang gani dili ako niya tinggan?

"Unsay nahitabo kanimo Iska, nga mao ra ka man og namatyan og iring? Nagmug-ot man ang imong nawong? Lugos gani ikaw motingog kanako? Unsa?" nagpusot-pusot ang akong pangutana.

"Wa kay silbi nga pagkabana ... Bador!" mibakho og kalit ang akong asawa ug subsob kaayo ang iyang dinangoyngoy.

"Sultihi ako sa bugtong hinungdan nganong makaingon ka kanako nga wa akoy silbi nga pagka-bana?" nagkanguhal ang akong tingog nga nagpakisayod.

Sa sinugdan, igo lang ako nga gitutokan sa akong asawa, diin iyang gipikpik ang nagsiwil sa akong bilahan ug iyang gikuptan nga nagkanayon:

"Nahisagmuyo ako Bador nga imong gibalibaran sa

nagpanikad kong kahidlaw!"

(Kataposan)