Dugos Ni Eva

Gula 236

May traysikol nga nagsingabot sa among nahimutangan. Among gipara. Maayo kay wala kini sakay nga pasahero. Mihunong kini sa among tungod ug nanakay dayon mi. Giingnan ni Rodney ang driver nga sa merkado mi magpahatod. Igo lang kining miyango dayong padagan sa traysikol.

Pag-abot namo sa merkado, among nakita ang daghang namaligya’g barbekyu ug puso sa atubangang bahin niini. Namili dayon mi’g barbekyu nga ipaluto. Samtang gipaluto pa ang among sud-an, miorder na mig puso. Pagkaluto sa sud-an, nangaon dayon mi.

Human sa pangaon, misugyot si Rodney nga mag-grocery una mig makaon-kaon namo samtang atua mi sulod sa pension house. Misulod mi sa Gaisano Balamban ug nangomprag mga makaon. Pagkahuman, namalik na mi sa pension house.

“Hangtod kanus-a man ta dinhi?” Gipangutana ko si Rodney.

“Wa pa ko masayod, Eva,” tubag niya. “Sa pagkakaron nagpadayon pa ko sa paghunahuna kun unsay sunod natong buhaton.”

“Wa ka ba magmahay, Rod, nga imo kong giunongan?”

“Nganong magmahay man ko? Katungdanan ko ang pagpanalipod nimo, Eva, tungod kay gimahal tikaw. Busa wa koy angay mahayan bisan unsa pay mahitabo.”

Nahinangop ko pag-ayo sa akong nadungog gikan kang Rodney. Tungod sa akong kalipay, gigakos ug gihagkan ko siya. Ug ang akong gibuhat maoy nagpukaw sa iyang kahigal. Dihadiha iya kong gihukasan ug gipahigda sa kama.

Gisaw-an namo pagtagay ang dugos sa lawasnong kalipay. Sa makadiyot nahikalimtan namo nga nag-atubang mig dakong problema. Ang sex maoy gihimo namong tighupay sa kabalaka nga mihasol sa among hunahuna.

“Kun wa ka pa, Rod, ambot kun unsa nay nahitabo nako karon,” matud ko human sa una namong lovemaking session.

“Di pa gyud buot ang Ginoo nga mahulog ka sa kaalaotan,” ni Rodney pa. “Pero di pa ta angay magmaya kay wa pa matapos ang atong problema.”-- Sumpayan pa