Ang dakong balay ni Fredo

Cebu City

Bay, pamisahe nang imong balay,  matud ni Sendo, "kay naay daghang namuyo nga dili ingon nato.”  Wa man lagi ko kakita Bay. Sige lang kay kun ila gani kong pakit-on, ako silang paabangon kay namuyo lang nga walay abang-abang," ni Fredo nga nagkatawa.

Ang balay ni Fredo ug Marta maoy pinakadaku sa barangay Maulawon. Gipatukod kini niya sa iyang kinitaan sa overseas sa didto pa sila sa Manila. Ug tungod sa kadaku, nakabsan si Fredo ug kuwarta busa wala kini mahuman sulod sa tolo ka tuig. Sa maong gidugayon, nakatigom siya og igo og nahuman ang iyang balay.

Sa wala pa kini mahuman, daghan na ang kahibudngan ang mga silingan nga kuno may white lady nga manambo sa mingaw nga tigbayon. Duna sab silay nakita nga 3 ka duwende nga nangaligo sa barel sa tubig nga hayag ang buwan.

Tuod man sa gipuy-an na nila ni Fredo ang balay, daghang kahibudngan ang iyang mga anak. Ang ulitawo nga nakatulog sa sopa, nakakita og 3 ka duwende nga nag-tinikling ibabaw sa iyang sista nga gipatong sa lamesa. Ang ilang makinilya, magmakinilya nga walay tawo. Motokar ang ilang piano sa kaadlawon. Apan wala kini panumbalinga ni Fredo pero ang iyang asawa nahadlok. Usa ka higayon niana, "Fredo, ibaligya nato kining balaya," matud sa iyang asawa.

"Ngano man?"

"Gahapon sayo pa kaayo sa hapon, pagsulod nako sa lawak sa mga bata sa second floor, nakakita ko'g dako kaayong kamot nga itom ug balhiboon diha sa bintana ug dayon nawala."

"Nganong mahadlok ka man sa kamot?"

"Duna diay ordinaryong tawo nga makaabot sa bintana sa second floor nga wala may katungtongan diha? Daghan na kaayo kong kahibudngan niining balaya busa ibaligya ta na lang ni."

"Sige, pangitaan ko og ahente kay mamalik na lang ta sa Manila," tubag ni Fredo nga nahinumdom sa mga sulti sa iyang mga higala nga daghang namuyo nga dili ingon nato sa iyang balay. Usa ka tungang gabii niana, misiyagit ang usa niya ka anak dalaga didto sa ilang lawak. Midali og dagan si Fredo gasunod ang asawa ngadto sa lawak. "Naunsa ka?" pangutana ni Fredo nga nahibulong  nga bukas ang pultahan.

"Dunay miabli sa pultahan nga ngil-ad kaayo og dagway."

"Wa diay ninyo kini i-lock?"

"Naka-lock na Pa," tubag sa usa ka anak. "Bisan ako kanunay makamatikod nga naay moabli sa pultahan pero wa ko ka-klaro sa hitsura kay ngitngit man."

"Sige lang kay dili na ta magdugay dinhi kay may mopalit na niini og mamalik ta sa Manila."

Wala madugay namalik sa Manila sila si Fredo ug sa  pagduaw nila sa ilang barangay usa ka tuig ang milabay, lain na usab ang tag-iya sa ilang balay kay nangahadlok ang nakapalit. (Kataposan)