Dugos Ni Eva

Gula 229

Dos Andanas ang balay ni Bungkoy. Ang unang andana maoy giokupar sa iyang pamilya. Ang ikaduhang andana maoy iyang gipaabangan. Iya ming gipasulod aron among makita ang bakanteng kuwarto sa ikaduhang andana.

Nakauyon mi sa maong kuwarto maong nakigsabot dayon si Rodney kang Bungkoy bahin sa abangan niini. Nagkasabot sila. Mibayad dayon si Rodney og one month advance ug one month deposit ngadto sa tag-iya. Unya gipahimutang dayon namo ang among mga gamit sulod sa kuwarto. Nagtambayayong mi si Rodney pagpanglimpiyo sa kuwarto.

“Maayo gani kay nakakita dayon tag kapuy-an dinhi, no,” giingnan nako si Rodney dihang nahuman na mig panglimpiyo sa kuwarto.

“Gibuligan gyud ta sa Kahitas-an,” ni Rodney pa.

“Maayo untag dili na makatultol dinhi ang mga tawo nga nangita nako.”

“Hinaot pa unta. Lisod toltulon kining dapita. Pero dili lang gyud ta mokompiyansa. Nagtuo kong mogamit gyud ang imong agawon sa iyang salapi aron pagpangita kanimo. Maka-afford man siya’g suhol bisan pila pa ka tawo ang mangita nimo.”

“Gituman gayod diay ni Mr. Prax Vidoya ang iyang bahad nga pangitaon ko niya. Wa nay lain. Nakaseguro kong iyang mga sinugo ang mga tawo nga nagpangita nako didto sa Inayawan. Maayo gani kay gipahibalo dayon ta ni James.”

“Nganong nakahupot man sila’g picture nimo?” Diin man nila makuha ang maong hulagway?”

“Nagtuo kong giutingkay nila ang akong mga gamit sulod sa servant’s quarter ug nasusihan nila ang akong picture album.”

Igo lang miyangoyango si Rodney sa akong gisulti.

“Tuod,” nako pa, “nganong morag nasuko ka man sa taxi driver kaganina?”

“Kinsay malipay nga binuang man ang iya,” ni Rodney pa. “Dili god siya mogamit sa metrohan sa iyang taxi. Dako baya nang kalapasan sa balaod.” -- Sumpayan pa