Ang gilibak

Alas tres sa hapon. Niagi si Hildo sa videokihan sa ilang Merlo luyo sa munisipyo sa ilang lungsod. Gusto una siyang mopauli kadiyot aron makatimo. Naa man siyas munisipyo nagtrabaho, sa opisina sa Tasador.

"Bay Hildo! Maayo kay naagi ka, bay! Hapit una. Tabangi kog hurot ining beer nga gibangka nako," sampit ni Alfie nga nag-atubang og upat ka gagmay'ng botelya sa serbesa sa lamesa sulod sa videokehan.

"Ikaw ra diay usa diha? Hain man diay ang nibangka nimog ilimnon?" ni Hildo.

"Tuas ila. Niuli kadiyot kay nagkuhag sumsuman," ni Alfie nga mapahiyomon. Wa kabalibad si Hildo sa suod niyang higala nga kauban sab og trabaho.

"Komusta na man diay mo sa imong bayaw nga si Perto?" sukot ni Alfie dihang nakahurot na silag tagsa ka botelya.

"Nagkaareglo na man mi sa barangay. Apan mao lagi. Tungod kay nakaagi nag away. Dili pareha sa una nga dukot gyud among kasuod," ni Hildo nga may dalang pagmahay sa tunada.

"Sa akong paminaw, inosente baya kaayo si Perto. Wa baya gyud siyay malisya ninyong banag asawa. Gusto siyang mauli inyong maayong relasyon," ni Alfie.

"Karon, malinawon na mi. Apan uga na gyud ang tinagdan," ni Hildo.

"Ganahan ka pang makigdyaming ni Perto?" ni Aflie. Nittungab sa ikaduhang botelya.

"Di na gyud, bay," ni Hildo. Nisugod sab sa ikaduhang botelya.

"Ngano man?" ni Alfie.

"Kaniadto, hapit man god sa tanang higayon ari mi magdyaming sa amo. Samokan si Sefa akong misis. Hugawan man god kaayo si Perto," ni Hildo.

"Mao   ba?" ni Alfie nga nibutang sa botelyang katunga na lay sulod.

"Magsigi siyag pangluwa. Morag tibihon. Unya kun panington manglugod. Dagkog lukot ang mga buling. Ipangwaslik lang," ni Hildo.

"Siyaro sab!" ni Alfie.

"Gawas pa ana, maayo man god kaayo siyang mokanta. Nindot kaayog tingog. Lupig mig akong ubang mga barkada," dugang ni Hildo.

"Kana hinuon, sa akong tan-aw. Wa man gyud na siya makig-indigay ninyo. Niya pa, tampohay ra man sa abilidad. Way sukdanay kun kinsay mas maayo," ni Alfie.

"Unya, unsaon mang may mga silingan man sab nga mga libakero ug libakera ug mga himantayon. Kanunay man nilang daygon si Perto. Maglagot ming maminaw," ni Hildo.

"Wa man gyud hinoon koy ikasaway ni Perto. Gawas sa pagkalibakero. Daghan kong istoryang nadawat nga sigi kono siyag panglibak sa akong asawa," ni Hildo.

"Wa man gyud tingale tawo nga di libakero. Kita manglibak man ta sa atong ginikanan, mga igsoon o ubang paryente. Ang libak nga ikasuko, kana gyung saway. Naa ra man nas nagtan-aw god ang hitsura. Si Perto, kay gipamana sa imong  manghud nga si Digna, giguwapohan siya. Ikaw kay nangasawa ni Sefa, gigwapahan ka. Dili man tingale na angay hatagag importansiyang mga libaka," ni Alfie. Nitungab sa botelya. Wa nitingog si Hildo. Nanglantaw sa halayo.

"Yuna pa ra god! Imo diay kong gipainom aron ibida nimo si Perto? Aron pats-apon mi nimo?" ni Hildon. Gibundak ang botelya sa lamesa nga wa nay sulod.

"Kalma lang bay. Suod tang higala. Suod sab nakong higala si Perto. Naa kos inyong tunga. Gikagool nako ang inyong kahimtang nga dili na gyud tinood nga suod. Gianugnan kos inyong pinagsamahan sa sobra bayente anyos," ni Alfie dayong tunol og laing botelya ngadtong Hildo. Napatiurok si Hildo.

"Kuan man god bay. May sakit sa kasingkasing akong asawa. Di ko gustong mograbe," ni Hildo nga nidimdim sa punong botelya.

"Unsa may labot ana sa inyong panagsood ni Perto?" ni Alfie.

"Namogos si Sefa nga molaylo una ko. Di na ko niya pahogoyhogoyon ni Perto. Ug ako nang supakon, kuyaw mang atakehon siyas kasingkasing," pasabot ni Hildo.

Nakalantaw sa halayo si Alfie. Ug nakita niya nga nagdangadanga si Perto nga nagdala og Tupperware.

Nahalingi si Hildo sa gilantaw ni Alfie.

"Si Perto man lagi na!" ni Hildo. Nanigang mga mata.

"Siya bitaw ang nibangka nakog ilimnon," ni Alfie nga daw nahilaw ang pahiyom.

"Buang ka man kaha!" nikalit og tindog si Hildo. Nagbilin og kuwarta sa lamesa. Gibayran niya ang iyang nainom. Dayong lakaw. Nakapanglingo si Alfie. Nanghupaw og halawom. (Kataposan)