Bugti sa pagsalmot sa Sinulog

Taga siyudad sa Davao si Oknalb. Dugay na siyang nag-antos sa sakit sa athritis. Halos mga muscle joints niya sa tuhod ug sa tiil mongulngol labi nag makakaon siyag mga sud-an nga kontra kaayo niini.

Daghan na siyag tambal nga nasulayan sulod sa ubay-ubay nang mga katuigan nga nakalabay apan igo lang kinign paminawon. Mawagtang la’g kadiyot ang kaul-ol, mobalik lang gihapon human sa pipila ka oras gikan sa pagtomar og mga tabletas. Ultimong mga albulariyo iya nang naduol ug bisag unsa na lang alternative medicines ang giinom, wala gihapoy silbi.

Unya usa ka gabii sa iyang pagkatulog, may usa ka itomong bata nga mipakita sa iyang damgo. Gidasig siya pag-anhi dinhi sa dakbayan sa Sugbu atol sa SINULOG; buwahan, malingaw siya sa pagsaksi sa nagkalainlaing contingents nga mosayaw sa kadalanan agi’g pagsaulog ug pagbalaan sa maong adlaw.

Nakamata si Oknalb. Kay mitokar na sab ang sakit sa iyang mga tuhod. Ug nakapangagho: "Pastilan, unsaon man intawon nako sa pag-adto nga ania, misugmat na pod ang akong sakit." Unya, ingon sa adunay gamay'ng anino nga sa daklit mipakita niya, gipahiyoman siya ug sa iya na unta kining tutokan, kalit lang nawala. Iyang nabati nga ingon sa dinhay talagsaong gahom nga mihunghong sa iyang galamhan: "Ay, sulayi lang god. Paninguhaa nga makasugakod ka sa paglakaw inig abot anang adlawa. Basta, magkita ta didto, ha? Magpaabot ko nimo. Di ka lagi magmahay."

Tuod man, pag-abot sa adlaw nga gisaulog ang Pista Senyor sa siyudad sa Sugbu, mibisita gyod si Oknalb sa Basilica del Santo Niño. Ug bisag nagkaangkaang siya sa kasakit sa iyang panglutahan, nanglimbasog gyod siya nga makaabot atubangan sa dakong estante nga naghalwa sa Balaang Bata.

Miluhod si Oknalb ug nakigsulti sa rebulto: "Ania ako, Sr. Santo Niño, aron pagsanong sa Imong awhag. Ugma, Domingo na. Sinulog! Dili kay motan-aw lang ako sa kataas sa parada sa manayaw. Kundili, moapil gyod ko. Intawon, tabangi ko nga makasugakod kining akong mga tuhod ug tiil nga haskang sakita gyong ilakaw."

Nakurat si Oknalb dihang iyang namatikdan nga ingon sa gikidhatan siya sa Imahen ni Sr. Sto. Niño. Unya dinhay bugnaw kaayong hangin nga mihasmag-hapuhap sa tibuok niyang kalawasan ug may nabati siyang hagawhaw: "Salamat nga wa mo pakyasa ang akong imbitasyon."

Pagka ugma, gituman ni Oknalb ang iyang saad. Miapil siya sa Sinulog bisag sakit pa gihapon iyang mga tiil nga itunob. Apan wala pa gani makaabot og tulo ka metros ang iyang pagsayaw og Sinulog nunot sa taas kaayong parada, iyang nabatyagan nga sa kalit lang, nawala sa hingpit ang tanang kaul-ol sa mga muscle joints nga iyang giantos. Busa sa tumang kalipay misiyagit siya: "Viva, Pit Senyor! Viva Pit Senyorrrr!!!" Mga singot ug luha naglumba pagpanaligdig sa iyang kaapingan. Ug nahuman gyod niya ang halos tibuok adlaw nga Sinulog sa labihang kasayon. (Kataposan)