Kun ikabalik pa lang ang panahon sa kabatan-on

Dili nalang kita mahinayon sa paglugsong ning bakilirong dalan ... Bador, aron mangadto kita sa lapyahan sa baybayon?" dihay kalaghaw sa tingog ni Iska nga mibadlong kanako nga mihana na sa pagkanaog gikan sa matitip nga kabukiran sa Kampawog.

Igo ko lang gibawsan og dili tiaw nga pahiyom ang akong asawa, nga sa akong tan-aw puparehas kanako maglugos na gani sa paglakang.

"Ingon diay niini ang mahitabo kanatong duha karon ... Iska? Lahi na gayod diay kun moabot na ang adlaw sa atong kahaponon," dihay gihagawhaw ko sa akong asawa.

Inanay wa lang tuyoa ... nanumbaye sa pagpasunding sa may gingi sa akong panumdoman sa kabag-ohay pa namong gikasal ni Iska ning among balangay sa Kampawog.

"Wa na gayoy susama kanindot kun magpuyo kita sa daplin sa baybayon ... Bador!" maoy kanunay masabak sa duha ko ka dunggan ang paraygong tingog sa akong asawa diin maglumbaanay kami panawom sa maputing tubig sa dagat diin among aninawon ang naghinubra nga katin-aw nga daw kasaminan. Maglumbaanay kami sa  pagpanagan sa maputing bunbon, diin hasta ang mga duot sa daghang agukoy mangaislag sa pagpanagan aron manago sa matag tagoanan nilang lungag.

"Buntag na man tingali Iska,kay bation na man og kahapdos ang hubo kong kalawasan nga piksan sa inayaay sa dagat nga mianam na sa paghunas?" kausa akong gipukaw si Iska nga gibati og dili tiaw nga kakapoy.

Igo na lamang ako gibawsan og pahiyom ni Iska nga salabtonon. Sa kabag-ohay god namong gikasal ... ning dako namong simbahan sa lungsod sa San Fernando, amo ang tanang talidhay nga gisabulakan og way pagkutat nga kamaya sa among dughan?

Baligho sa panahon ... mausabon. Hapit wa nay makinhas sa hunasan. Midagsang ang pabuto sa dinamita, diin hapit ang mga gagmay'ng isda mangaangin og pangamatay.

"Kay aduna ka may kabahin sa naanhing mong ginikanan Bador, sa may bukiran sa Kampawog, hain may mas maayo adto na lang kita mopuyo og mananom og mga lanubo nga lagutmon.

Mga tuig gihulpa sa nanglabay'ng panahon. Ang kanhing kabaskog nangagiw na sa akong kalawasan. Ug didto kanunay kong hagawhawon nga mao rang usa samtang magsud-ong ako sa kabukiran sa Kampawog nga magkanayon:

"Kun ikabalik pa lang ang panahon sa kabatan-on!" (Kataposan)