Dugos ni Eva

Nanggikan dayon mi si Rodney. Nanakay mi'g taxi ug nagpahatod ngadto sa  SM. Sa among paghiabot sa naasoy'ng mall, namalit dayon mi sa akong mga gamit. Igo gyod nga nahuman mig shopping, tingpanihapon na. Misulod mi sa usa ka outlet sa KFC ug nangaon. Si Rodney ang nangunay pag-order sa among pagkaon.

Human sa pangaon, nanggawas na kami si Rodney sa mall. Misakay mig taxi ug nagpahatod ngadto sa gipuy-an sa iyang iyaan sa Inayawan.

"Nasayod na ba ang imong iyaan nga milayas ko gikan sa poder sa akong agalon dinhi sa Cebu?" Gipangutana ko si Rodney samtang nagdagan ang taxi nga among gisakyan paingon sa Inayawan.

"Wa ko pa sila sultihi niana," matud ni Rodney. "Sa imong tan-aw, maayo kaha nga ato silang tug-anan?" "Wa man tingali  daotan kun masayod sila."

"Hinuon sab. Buyno, tug-anan ko sila si Tiya mahitungod nianang butanga."

Paghiabot namo sa balay sa iyaan ni Rodney sa Inayawan, midiretso ko sa kuwarto dala ang mga pinalit namo nga mga sinina ug uban pa. Si Rodney nagpabilin sa sala ug nakigsulti sa iyang iyaan. Nadungog ko ang ilang gipanagsultihan. Gisuginlan ni Rodney ang iyang iyaan mahitungod sa akong paglayas gikan sa panimalay sa mga Vidoya atol sa lawom nang kagabhion.

"Maayo gani kay nakaikyas gyod siya ug wala mahulog sa kaalaotan sa mga kamot sa iyang agalon nga salbahis," nagkanayon ang iyaan ni Rodney.

"Wala pa gyod itugot sa kahigayonan, Tiya," ni Rodney pa. "Pero dili kaha mameligro ang kinabuhi ni Eva? Tingalig pangitaon siya sa iyang amo?"

"Ambot lang, Tiya."

Human sa panagsulti nila ni Rodney ug sa iyang iyaan, misulod siya sa among lawak. Giingnan ko siya nga mamiya na kami sa balay sa iyang iyaan. (Sumpayan pa)