Dugos ni Eva

Naluoy ko ni Rodney. Nagbasol na hinuon ko kun nganong ako siyang gibawo ug gibalibaran. Pero dili mahimong pahagkon ko siya. Daghan pa mi'g angay panagsultihan. Daghan pa mi'g angay husayon. Sa akong bahin, daghan pako'g angay ikompisal ngadto kang Rodney mahitungod sa nahitabo sa akong kinabuhi dinhi sa Cebu. Nianang pagkaudto, may nanuktok sa lawak nga akong nahimutangan. Ablihan ko na unta kini apan nabati ko ang tingog ni Rodney didto sa luyo sa pultahan.

"Maniudto na ta," niya pa. "Gawas na diha."

Gilahos na gyod nako'g abli ang pultahan. Nakita ko si Rodney nga nagbarog sa gawas sa pultahan. Nagkuyog mi ngadto sa komedor. Mitambong dayon mi sa lamesa. Dihang nagkatigom na ang tanan, gisugdan ang pangaon.

"Ngano bang wa man moy tingogay diha?" Sukit sa iyaan ni Rodney ngari kanamo. "Nag-away mo nga mora man mo'g nagbungol bisan nagtupad mog lingkoranan?"

"Wa man, Tiya," ni Rodney pa. "Ingon gyod si Eva niana. Hilomon."

Gitibawas namo ang pangaon. Pagkahuman, mibiya ko sa kan-anan. Mibalik ko sa kuwarto. Misunod usab dayon si Rodney kanako. Wala na siya  manuktok sa pultahan. Midiretso na siya'g sulod sa kuwarto kay abiyerto man ang pultahan.

"Daghan ta'g angay panagsultihan, Eva," nagkanayon si Rodney.

"Nasayod ko," matud ko nga nakaingon sa hilom nga miabot na gayod ang panahon nga akong gipaabot nga magkadayganay na kami si Rodney.

Mitupad si Rodney paglingkod nako sa ngilit sa katre. Miginhawa una siya'g lawom.

"Nganong mibiya ka man didto sa ato nga wala magpahibalo nako?" Misugod na siya pagpangutana nako. "I'm sorry, Rodney," nako pa. "Kalit kaayo ang akong hukom. Nagpahilayo ko sa atong dapit kay nauwaw ko pag-ayo sa eskandalong nahitabo sa atong pamilya."

"Pero nganong wa man ko nimo pahibaw-a bisan na manlang sa text?" Miduko ko og wala  makatingog. (Sumpayan pa)