Ang Babaye Sa Bentana

Wala makatingog si Melissa Viloron alyas Cheska sa gipadayag nga kamatuoran ni Cyrus. Igo lang kining miduko sa iyang atubangan.

"Kabahin sa giplano kong panimalos ang akong pagtakoban,"  nagkanayon si Cyrus. "Gusto kong dula-dulaan ka una sa dili ko pa hingpiton ang akong panimalos."

"Maayo diay nakong pagkasulod sa imong laang," ni Cheska pa.

"Way sukod sa balos."

"Di ko makabasol nimo.Nasayod ko nga dako kaayo ko'g tulubagon sa inyong pamilya sa kamatayon ni Wayne. Magbasol man ko sa makadaghan, dili na ikabalik ang iyang kinabuhi. Akoy nakaingon sa iyang kamatayon."

"Pinangga kaayo nako ang akong manghod. Kini ang hinungdan nga gusto tikaw'ng panimaslan. Gusto kong bation mo ang kasakit nga labaw pa sa gibati ni Wayne."

"Karon nga nagkadayganay na kita sa kamatuoran nga maoy lintunganay sa atong pagpakaaron-ingnon ug pagtakoban, andam na kong modawat sa bisan unsang silot nga imong ipahamtang nako bugti sa akong gihimo sa imong igsuon."

Wala motingog si Cyrus. Napahit niya ang iyang wait.

"Andam kong modawat sa imong panimalos, Cyrus," ni Cheska pa. "Kun kini ang paagi aron ikapahungaw mo ang gibati mong kasilag ngari kanako."

"Panimaslan ko man ikaw sa makadaghan," matud ni Cyrus. "Dili na mobangon ang akong manghod gikan sa iyang lubnganan."

"Pero di  ba mao man kanay imong tumong sa pagpangita nako?"

"Tinuod kana. Apan wa ko magdahom nga kalit lang mausab ang dagan sa mga panghitabo nga naglambigit kanimo ug kanako."

"U-unsay buot mong ipasabot?"

"Giangkon ko ang imong pagkababaye sa makadaghan agi'g panimalos. Pero sa kapulihay, naluoy ko nimo. Nahulog ang akong pagbati nganha nimo. Hangtod nga akong nasuta nga nahigugma na diay ko nimo. I love you, Cheska."

"Nahigugma ka sa babaye nga nakasala sa inyong pamilya?"

"Yes. Ug gusto kong masayran kun may gugma ka pa ba gihapon nako." (Sumpayan pa)