Ang Babaye sa Bentana

(Gula 38)

“Unsay plano mo karon, Cyrus?” Nangutana si Melissa Viloron alyas Cheska nga misangpit na sa tinuod nga ngalan ni Cyrus.

“Nasayod ka ba kun nganong nagtakoban kog laing ngalan sa akong pagpaila sa akong kaugalingon nimo?” Misumbalik pagpangutana si Cyrus.

“Wala koy ideya mahitungod niana.”

“Kabahin kini sa giplano kong panimalos. Mianhi ko sa Sugbu aron pangitaon si Melissa Viloron ug panimaslan tungod sa kamatayon sa akong manghod. Kun wa nako masusihi ang imong diary, di nako masayran nga ikaw diay si Melissa Viloron, ang babaye nga akong gipangita, kay nausab na man ang imong panagway tungod sa pagpa-ilawom mo sa plastic surgery.”

“Sa dihang akong nasayran nga igsuon nimo si Wayne, mibati kog kahadlok. Nabalaka ko nga imo kong tulisokon sa nahitabo sa imong manghod. Pero kadiyot ra ang maong kahadlok. Akong na-realized nga dili ko angay mahadlok nimo kay wa ka man masayod nga ako si Melissa Viloron. Maong kompiyansa ko kaayo.”

Wala motingog si Cyrus. Igo lang niyang gitutokan si Melissa alyas Cheska.

“Gikaguol ko usab ang nahitabo kang Wayne, Cyrus. Wa  ko magdahom nga ang akong pagdispalko sa kuwarta sa kompaniya makahatag kaniya’g dakong problema nga maoy nahimong hinungdan sa iyang kamatayon. Nasayod kong dako kog sa’a nga nahimo kaniya. Hangtod karon gihasol pa ko sa akong konsensiya.”

Nakita ni Cyrus nga may mga luha nga nanaligdig sa kaapingan ni Cheska.

“Dihang nasayran ko nga managsuon kamo si Wayne,” mihingoshingos si Cheska. “Dihadiha nakahukom kong itugyan kanimo ang akong pagka babaye. Namasin ko nga pinaagi sa akong pagbuhat sa ingon, matibhangan og diyotay ang akong sa’a ngadto sa imong manghod. Dili ko cheap nga pagka babaye, Cyrus. Apan gitahan ko kanimo ang akong kaputli sa dakong kasayon tungod kay nasayod ko nga dako  kaayo kog tulobagon sa inyong pamilya.”

Unya mibakho na gayod si Cheska. – Sumpayan pa