Dugos ni Eva

Duol na gyod si Mr. Prax Vidoya sa gate. Maayo gani kay sa pagliso nako sa yawe nga nag-ungot na sa yawehanan, milibkas ug naabli ang puthaw'ng sera sa gate. Midali kog gawas. Apan nakawhatan gayod ni Mr. Vidoya ang akong kamot. Iya kong gipugngan aron dili makadagan.. Pero nakakita kog higayon. Gitindakan ko ang iyang pugaran. Mitikuskos siya sa kasakit ug nalup-og.

Midali kog dagan palayo  subay sa sementadong dalan. Misantop sa akong hunahuna nga kinahanglan gyod nga makapalayo ko sa balay sa mga Vidoya. Bahala nag asa ko mosangko sa akong pagdagan basta kay mahilayo lang ko kang Mr. Vidoya.

"Pagabayran mo ang gibuhat mo kanako, Eva," nadungog ko ang tingog ni Mr. Vidoya samtang nagkalayo na ko sa iyang nahimutangan. "Pangitaon ko gyod ikaw."

Wala ko na panumbalinga ang gipanulti ni Mr. Vidoya. Mipadayon gyod ko pagdagan. Wala gyod koy gikasugat nga sakyanan. Residential area  man god ang dapit nga nahimutangan og sagad sa mga sakyanan nga mosulod sa maong dapit mga pribado. Tagsa ray taxi nga mosulod sa maong dapit. Walay biyahe sa PUJ.

Dihang layo na kog nadaganan, mihunong ko. Naglakaw na lang ko. Miliko ko sa usa ka eskina ug mipadayon paglakaw. Pamahala na lang ang akong gibuhat. Ang mahinungdanon alang nako mao nga makaikyas ko sa mga kamot ni Mr. Vidoya. Kun simbako makasugat kog daotang tawo sa akong paglakaw, ang Ginoo na lay mag-igo nako.

Mipadayon gyod ko paglakaw nga walay tumong. Miliko ko pag-abot sa laing eskina ug mipadayon gihapon paglakaw. Unya natukmaan na sab nako ang laing eskina. Miliko na sab ko. Mipadayon paglakaw. Hangtod nga nahisangko ko sa lapad nga karsada diin may mga PUJ ug taxi nga nagdagandagan. Nakahunahuna kong mosakay.

Mopara na unta kog jeep sa  dihang nakahinumdom ko nga wala diay koy dalang kuwarta. Mora kog nahugno nga mipadaplin og balik. Nasubo kong naghunahuna nga ang tanan kong kuwarta nahibilin sa servant's quarter sa panimalay sa mga Vidoya. (Sumpayan)