Dugos Ni Eva

Gula 204

Naningkamot gyud kong makalingkawas sa mga kamot ni Mr. Prax Vidoya. Dili ko makatugot nga molampos siya sa daotan niyang laraw kanako. Dili ko itugyan kaniya ang akong pagka babaye sa dakong kasayon. Panalipdan ko gyud ang akong kaugalingon.

Dihang nakahigayon ko, akong gisikaran ang pugaran ni Sir Vidoya. Maayo tingaling pagkaigo sa iyang balls kay mitikuskos man siya sa kasakit. Tungod sa akong kalagot niya, gipunit nako ang lampshade nga nahimutang dapit sa ulohan sa iyang kama ug gilambos ko kini sa iyang ulo. Nagkadugo ang ulo ni Sir Vidoya.

Nakaamgo nga kinahanglan kong makalikay sa peligro, midali ko’g gawas sa lawak ni Mr. Vidoya. Mipaingon ko sa akong lawak sa servant’s quarter aron panghiposon ang akong mga gamit. Apan kalit lang nausab ang akong hukom. Wala na koy panahon sa pagpanghipos sa akong mga gamit. Kinahanglang makapahilayo na ko sa panimalay sa mga Vidoya aron paglikay sa tinong kaalaotan.

Milahos lang gihapon ko sa servant’s quarter aron pagkuha sa yawe sa gate. Gibilin man ni Nang Badang nako ang yawe sa gate sa dayon niyang larga paingon sa Negros kay ako man ang tig-abli sa gate samtang wala pa siya. Gitultol nako ang pungpong sa mga yawe nga akong gisab-ong sa lansang sulod sa kuwarto. Migawas dayon ko sa kuwarto dihang nakuha ko na kini.

Midali ko pagpaingon sa gate aron ablihan ang pultahan. Kinahanglang makaikyas ko gikan sa mga kamot ni Mr. Prax Vidoya.

“Hunong...!”

Nabati ko ang tingog ni Mr. Vidoya. Sa akong paglingi, nakita ko siya nga midali pag-agpas nako. Wala ko mohunong. Midagan ko paingon sa gate. Gipasok nako ang usa ka yawe nga akong nagunitan apan wala kini mosibo. Nagkapuliki kog pangita sa yawe nga mosibo sa yawehanan sa gate aron kini maabli.

Nagkaduol na si Mr. Vidoya sa gate. Nagkurog ang akong kamot nga mipaslak sa kataposang yawe nga nag-ungot sa key holder ngadto sa yawehanan. -- Sumpayan pa