Ang Babaye Sa Bentana

"U-unsay buot mong ipasabot?" Nakasukna si Melissa Viloron alyas Cheska nga wala makasabot sa gisulti ni Cyrus.

"Natuman na gyod ang akong tinguha pag-angkon sa imong gugma," pasabot ni Cyrus. "Gikalipay ko ang imong pagtugyan ngari kanako sa imong pagka babaye."

"Gihimo ko kini tungod sa mabug-at nga hinungdan?"

"Unsa nga hinungdan?"

"Gugma ang unang hinungdan. Pero gawas sa gugma, aduna pay laing hinungdan nga di pa nako ikasulti nimo sa pagkakaron. Apan tug-anan ko ikaw niini inig-abot sa tukmang panahon."

Migawas na si Cyrus sa gipuy-an ni Cheska. Midiretso siya sa balay nga iyang gipuy-an nga atbang ra usab sa gipuy-an sa dalaga. Milahos siya sa iyang lawak. Sa iyang pagsulod, giserad-an dayon niya ang pultahan niini ug gihubo niya ang gisul-ob niyang polo ug karsones. Nag-brief na lang siya.

Mihigda siya sa kama. Naghanduraw sa nahitabo nila ni Cheska didto sa cottage sa beach resort nga nasundan sulod sa balay nga gipuy-an niini. Nalipay siya nga wala siya maglisod pag-angkon sa pagka babaye niini. Ingon sa boluntaryong gitahan ni Cheska ang kaugalingon niini kaniya.

Unya, nahinumdom si Cyrus sa gisulti ni Cheska sa dayon na niyang pauli. Nga gawas sa gugma, may lain pang hinungdan kun nganong gitugyan sa dalaga ang pagka babaye niini kaniya sa dakong kasayon. May lain pa kahang tinagoan si Cheska nga wala niya masayri? Nakaseguro siyang siyay nakauna sa pagka babaye niini. Busa dili tingali bahin sa kagahapon niini uban sa laing lalaki ang buot niining itugyan kaniya sa umaabot nga mga adlaw.

Wala na lang hasola ni Cyrus ang iyang hunahuna mahitungod sa maong butang. Ang importante mao nga nalipay siya karon tungod kay misugod na siyag ani og kalamposan sa iyang mga plano. Nasugdan na niya ang pagpanimalos sa kamatayon sa iyang manghod nga si Wayne. (Sumpayan pa)