Ang Babaye sa Bentana

Gula 30

Mikawas si Cyrus gikan sa ibabaw ni Melissa Viloron alyas Cheska dihang nahurot na niya’g pahungaw ang iyang biga. Nalipay siya sa iyang gihimo, dili tungod sa sensasyon nga iyang nasinati sa pagdimdim niya sa katam-is ni Cheska, kondili sa paghunahuna nga nasugdan na niya ang pagpatakod ngadto sa babaye sa HIV virus nga mitakboy kaniya. Nasugdan na gyud niya ang iyang panimalos.

“Wa ka ba magbasol sa nahitabo nato?” Gipangutana niya si Cheska dihang nag-ilis na sila aron mamauli.

“Di mahitabong magbasol ko,” nagkanayon ang babaye. “Akong kagustohan ang pagtugyan kanimo sa akong pagka babaye.”

Wala motingog si Cyrus. Nahimuot siya sa hilom sa gisulti sa babaye.  Alaot nga Cheska, bagulbol niya sa hilom. Kun nasayod pa lang kini nga panimalos ang iyang tumong sa pagpakiglambigit niini, tingali dili kini motahan kaniya sa pagka babaye niini sa dakong kasayon. Dili siya angay mobati’g kaluoy kang Cheska. Walay sukod sa balos! Ug wala pa siya matapos sa iyang pagpanimalos ngadto niini.

Human makailis, nanggawas na sila sa cottage. Naggunitay pa sila sa kamot samtang nanglakaw. Ang mga tawo nga makakita kanila hayan magtuo gayod nga matuod silang managhigugmaay. Lakip si Cheska nagtuo tingali nga nahigugma si Cyrus kaniya. Walay kalibotan si Cheska nga dili gugma ang nagtukmod kang Cyrus sa pagpakigrelasyon kaniya kondili ang kasilag.

Nagpahatod sila’g taxi ngadto sa ilang gipuy-an sa squatter’s area. Midiretso sila sa balay nga gipuy-an sa dalaga.

“Unya na pauli,” matud ni Cheska pagsulod nila sa sala.

“Okey,” mubong tubag ni Cyrus.

Milingkod si Cyrus sa sopa samtang nagpatugtog si Cheska sa collection niini sa mga kanta ni Celine Dion. Mahiligon gayod si Cheska sa pagpangoleksiyon, lakip na sa pagtipig sa mga handomanan sa kagahapon -- sama sa diary niini.

Miduol si Cheska sa gilingkoran ni Cyrus. Nagpasabak kini kaniya. -- Sumpayan pa