Matuod nga diwa sa Pasko

Atubangan sa gamay'ng lamesa sa sulod sa ilang barungbarong, nag-atubang ang amahan ug anak nga pulos malipayon. Bisperas sa Pasko ug nagpaabot sila si Mar ug Junior sa  tungang gabii sa pag-abot sa kasaulogan sa Pasko.

"Malipayong Pasko, Dong Jun....!" nagpahiyom si Mar nga mitunol sa giputos niyang pinaskohan alang sa site anyos niyang anak.

"Malipayong Pasko sab nimo, Tay...!" ni Junior nga nagtingsi usab nga mihatag sa pinutos niyang pinaskohan sa basurero niyang amahan. Kabos man tuod sila, apan way sama ang gibati nilang kalipay nga nagpaabot sa tungang gabii aron paghangop sa Pasko. Sa sulod sa ilang barungbarong, nangumbitay ang hinimong mga parol ni Mar nga gama sa silver nga mga papel sa mga kaha sa sigarilyo, nga maoy timaan nga miduyog sila sa pagsaulog sa Pasko. Ibabaw sa gamay nilang lamesa, andam na usab ang ilang noche buena -- usa ka bultong fried chicken, pancit canton nga usa ka plato, duha ka platong kan-ong humay, family size coke, ug lapad nga Tanduay 65 nga maoy labing paborito ni Mar. Diha usab ang usa ka putos nga sliced bread nga gituyo gyud pagpalit ni Junior sa Fountainhead Bakeshop.

Nag-iyahay og abli sa ilang mga putos nga pinaskohan ang pobreng amahan ug anak.

"Wow! T-shirt ug karsones...!" nakatuaw si Mar nga hilabihang lipaya nga nagsud-ong sa nadawat nga pinaskohan gikan sa bugtong anak.

"Yahooo! Gomang sapatos! May sapatos na gyud ko, Tay....!" nakasinggit usab si Junior sa tumang kalipay nga misulingsuling sa pinaskohan nga hinatag sa iyang amahan. Mga ukay-ukay nga pinaskohan nga maoy naabot sa pagpalit sa amahan ug anak, nga alang kanila, usa ka espesyal nga gasa, alang sa pagsaulog nila sa Pasko.

Basurero lang si Mar. Kada-adlaw siya nga magdusoduso sa iyang karomata sa kadalanan, aron sa pagpangapkap sa mga basura nga mahalin sa suki niyang junk shop. Kabos nga matang sa panginabuhian, apan nakalahutay siya sa pagbuhi sa bugtong anak, nga gibiyaan sa way puangod niyang inahan dihang mikuyog ug nakigtaban kini og laing lalaki nga wala na makaantos sa pagka-basurero ni Mar.

Nagkugi usab si Junior aron makabangkelya sa basurero niyang amahan. Sa edad nga site, nahimong kugihan nga newsboy sa Banat News si Junior, gikan alas kuwatro sa kaadlawon, hangtod sa alas sayes sa buntag, dayong sulod sa iyang klase sa Grade One inig-alas otso sa buntag.

Unya, misulbong ang nagkalidades nga butobuto sa whistle bomb, bawang, rebentador ug kuwitis sa tibuok dapit sa eskuwater. Daw gisangag sa masipang butobuto ang tibuok siyudad.

Nahatindog sila si Mar ug Junior sa sulod sa ilang barongbarong. Nagginaksanay ang amahan ug anak.

"Pasko na gayud...!" nagkadungan og singgit sila si Mar ug Junior. Kabos man tuod ang amahan ug anak, apan sa sulod sa ilang barongbarong ning tungang gabii, mitunhay ang matuod nga diwa sa Pasko nga ilang gihangop ug gisaulog. (Kataposan)