Pasko na, mahal ko

Gipunit dayon ni Ben ang bag nga nahulog sa babaye nga misakay sa kotse. "Sus! Kadaghang kwarta ini," hapit makasinggit si Ben sa iyang nakita sulod sa bag. Dunay tag duha ka libo, may tagsa ka libo ug mga tag-lima ka gatus ug pipila ka tag-usa ka gatus. Iyang gibanabana nga moabot kini sa duha ka gatus ka libo.

Giputos niya kini sa iyang polo nga bulingon ug nag-kamisin na lang siyang mipauli.

"Nani-udto ka na?" nangutana siya sa iyang asawa.

"Wa man tay bugas Ben," tubag sa iyang asawa.

"Pag-palit og sardinas ug pan didto sa bakery," gitunol ni Ben ang usa ka gatus.

"Diin ka man og kwarta Ben?"

"Unaha una ang atong makaon ug unya ra ta magsulti ana."

Paglakaw sa iyang asawa gitan-aw ni Ben ang sulod sa bag. May nakita siyang ID nga ang ngalan Perla G. Santos. 'Si Perla Gonzaga kini, akong classmate sa high school," matud ni Ben sa kaugalingon. Gisugdan niya pag-ihap ang kuwarta sa dihang miabot si Auring.

"Kadaghan god ana Ben, diin ka man niana?"

"Akong napunitan -- nia man gani ID," ug gitunol ang ID.

"Oy! Si Perla Gonzaga man ni Ben, ang atong classmate sa high school ug amiga kaayo nako."

"Mao sab bitaw akong pagtoo. Unya, unsa may atong buhaton ini? Wa ra ba gyud tay kuwarta, Pasko na ugma, may sakit pa si Junior."

"Ato lang i-uli   Ben. Suod ko ra ba kaayo si Perla bisan hapit na mo-napulo ka tuig nga wa mi magkita."

"Na hala, iuli nato. Kining apelyedo nga Santos, di ba kaha ni si Felimon kadtong usa nato ka classmate."

"Tingali, basin sila gyud ang nagkadayon kay uyab man to sila."

Pag-abli sa opisina, nangatahuran ang magtiayon. "Maayong hapon ma'am."

"Maayong hapon usab. Oy di ba si Ben ug Auring mo?"

"Kami bitaw ni ma'am," tubag ni Ben. "May tuyo lang mi."

"Sus, kadugay na natong wa magkita. Panglingkod una mo kay tawgon nako si Felimon sa pikas kuwarto."

"Ayaw na lang ma'am kay dili man mi magdugay."

"Unsa man diay unta na?" sagbat ni Felimon nga maoy pagawas sa pikas kuwarto.

"Sir, napunitan nako ang bag ni Mrs. Santos, nia akong dala para iuli pero nakuhaan namo og usa ka gatus ka way mi bugas," dayong tunol ni Ben sa bag.

"Hesus! Wa gyud mi magdahom nga mabalik pa ni namo. Unsa may atong ikapahalipay niining atong mga classmates ug suod pa gyud nga mga higala Felimon?"

"Unang pahalipay namo kay wa man moy bugas, mao kini," ug miihap si Felimon ug napulo ka libo gikan sa bag. "Dawata kini ug ugma sa udto adto mo sa balay kay may salosalo ta, niay adres. Sa liwas sa Pasko magsugod ka og trabaho isip usa ka kolektor kay ang mga tawo nga sama kaninyo angay gayud tabangan."

Sa nanglakaw na sila, hapit dili makatoo ang magtiayon sa suwerte nga ilang nadawat. Madayon gyud diay ang ilang Pasko.

"Mag-grocery una ta Ben," gibuak ni Auring ang ilang kahilom.

Mipahiyom si Ben dayong agbay kang Auring, "Natural kay Pasko na mahal ko." (Kataposan)